هتطبخى إيه النهاردة.. حمام محشي
كتبت / عزه السيد
احلي حمام محشي وبسر الخلطه
المكونات
جوزين حمام او (حسب الرغبه)
كوبين رز او فريك لكل حمامه ربع كوب ارز او فريك
٢ بصله مفرومه ناعم
ملح وفلفل
معلقه ص قرفه
معلقه ص بهارات
معلقه ص سكر
للتحمير زيت غزير
كوب لبن
الطريقه
اول حاجه والأساس في التنضيف لما ندبح الحمام متفتحيش الرقبه خالص
وتسحبي الزور من البطن من جوه الحمامه يعني متجيش عند الرقبه خالص واتعاملي معاها بحرص عشان متتفتحش منك وتبقي محتفظه بشكلها
وبعدين واحنا بنضفها نحطها تحت الحنفيه ونحاول نفرغ بين الجلد واللحم بتاع الصدر
ونحطها تحت الحنفيه ونخلي المايه تدخل جواها عشان تتمط معايا ومتتعبنيش في الحشو ومتتقطعش مني
الحشوة
سواء إن كان رز او فريك هي نفس الخطوات
هنجيب حله فيها معلقتين سمنه بلدي
وننزل بالكبد والقوانص تتشوح
ننزل بالبصله المفرومه ومعاها معلقه ص سكر تقلبتين كده
وننزل بالرز أو الفريك المغسول ومتصفي كويس جدا ونشوحهم سوا ونحط بقي ملح وفلفل ومعلقه قرفه ص ونقلب
وننزل بنص كوب ماء أو شوربه
وتهدي النار يتشرب الارز أو الفريك ونسيبه يبرد
ونجيب الحمامه ندعك بطنها برشه ملح وفلفل اسود
ونبتدي نحشي البطن الاول وبعدين نحط معلقتين من الحشو تحت الجلد وبعدين نقفل الحمام
نجهز ماء السلق مايه بتغلي جدا ونحط فيها ورق لورا وحبهان ومستكه وجزر وبصله وطماطم مبشوره وملح وفلفل
بعدين ننزل بالحمام ونهدي النار خالص
الحمام مبيخدش سوا كتير ممكن من نص ساعه لساعه الاربع ده لو هيطول
طلعيه وسيبيه يبرد تماما
وهاتي كوب من اللبن أو الكريمه اللباني حطيه في طبق ونزلي فيه الحمامه
ويكون الزيت غزير وسخن انزلي بالحمامه في الزيت بعد مانزلتيها في اللبن
اول ماتاخد لون دهبي حلو طلعيها وقدميها بقي
بالف هنا وشفا
