هتطبخى إيه النهاردة.. حمام محشي فريك
كتبت / عزه السيد
المقادير:-
حمام حسب عدد الافراد
لكل حمامة معلقتين كبار من الفريك المنقوع لمدة ساعه
كبد و قوانص الحمام
بصله مفرومة
ملح وفلفل وحبهان وجوزة الطيب وعود قرفة خشب(حسب الرغبة)
طماطمايه صغيرة
وبصله صغيرة
عودين كرفس
ملعقتين سمنة
خلل سنان او خيط
الطريقة :-
نتبل الحمام بملح و فلفل و معلقتين من البصلة و نسيبه لحد ما نجهز الحشوة
في وعاء علي النار توضع السمنة وباقي البصله و الكبد و القوانص والبهارات ونشوحهم جيدا حتي قرب السوي
يضاف الفريك المتصفي و يقلب 5 دقائق مع الكبدة والقوانص ثم ترفع الحشوة من علي النار ونسيبها تبرد
نحشي الحمام ونراعي اننا منذودش اوي و نسيب مساحة صغيرة فارغة داخل الحمامة لنضج الحشوة يعني تكون مهوية شويه مش مكتومة
نقفل الحمامة من اسفل و من عند الرقبة بخلة اسنان او بخيط وابرة معقمة
نغلي مية ونضيف عليها البهارات مع الطماطم والبصله السليمة وعودين كرفس
يوضع الحمام في الماء المغلي المتبهر علي نار هادية
و بعد السوا نسيبه يبرد شوية ونحمره في سمنة بلدي
او ندهنة بفرشة حليب مع معلقة سمنة وندخله الفرن
وصحتين وهنا .