كتبت / عزه السيد
اشهى المقبلات والسلطات
سلطه طحينه …
ثلاث معالق كبار طحينه – نص كوب ماء دافئ – معلقة كبيرة خل – رشة ملح – رشة صغيرة كمون – عصير نصف ليمونه – فصين ثوم مفرومين ناعم – معلقة كبيرة بقدونس مفروم – معلقة كبيرة زيت
نخلط كل المكونات على بعض ونقلبهم كويس لغاية ما نحصل على القوام المطلوب
سلطه حمص بالطحينة …
(حمص منقوع ليله كامله ونغيرلوا الميه ثلاث مرات على الاقل ونسلقه فى ماء وملح و كمون وعصير طماطم وبصله كاملة بدون تقطيع.
بعد ما يستوي ونجرب نهرس واحده بإيدينا تصفية كويس ونحطة فى الخلاط أو الكبة ونضيف عليه معلقتين كبار طحينة ومعلقة كبيرة زيت وملح -كمون – فصين ثوم مفروم -شطه حسب الرغبه -عصره نصف ليمونه -ملعقه صغيره خل ونضيف عليه نصف كوب من ماء السلق حتى الحصول على القوام المناسب .. يوضع فى طبق التقديم ونضيف عليه معلقة زيت ورشة بابريكا وبقدونس للتزيين .
سلطه بابا غنوج…
باذنجان اسود رومى وسط – وملعقه طحينه كبيره -ملعقه ماء-كبيره – ملح -كمون -ثوم مفروم -عصرة ليمون – بقدونس مفروم
نشوى الباذنجان فى الفرن أو على عين البوتجاز مع التقليب على كل جانب
بعد ماتستوى نسيبها تبرد تماماً وبعدين نقشرها
بعدين نعمل سلطه الطحينه ونحط الباذنجان عليها ونهرسه بالشوكه ونقلب الخليط بشكل جيد.
سلطه كول سلو
٢كوب كرنب سلطه متقطع صغير -جزره مبشوره – ثلاث ملاعق كبيره مايونيز – معلقتين صغيرين سكر بودره او معلقة كبيرة عسل ابيض -ملعقه خل صغيره ملح وفلفل
نقلب المايونيز والسكر والخل ونحط عليهم الكرنب والجزر ولازم تتحط فى التلاجه ساعتين قبل الاكل عشان تتجانس والكرنب يبقى اطرى .
سلطه خضار بالمايونيز
بطاطس مسلوقه ٣/٤سوى عشان متتهريش نسلقها ونطلعها فى ماء مثلج – بسله وفاصوليا مسلوقين ثلاث ارباع سوى ونطلعهم على ماء مثلج أيضاً
الدريسينج (ملعقين كبار مايونيز – ملعقه كبيرة لبن – ملعقه خل صغيره – نصف معلقة صغيرة ثوم مفروم – معلقة صغيرة زيت – نصف معلقة صغيرة سكر – ملح وفلفل وزعتر وكمون -عصرة نصف ليمونه )
نقلب مكونات الدريسنج مع بعض كويس ونضيف عليهم الخضار وتترك فى التلاجه على الأقل ساعة قبل التقديم .
الثوميه
٣ معالق كبار مايونيز – كوب زبادى – ثلاثة فصوص ثوم – ملح وفلفل ابيض – عصره صغيره ليمون – معلقة كبيرة خل وتضرب فى الخلاط ويضاف الزيت سرسوب بالتدريج من أعلى حتى نحصل على القوام المطلوب