وفاة القامة العلمية المصرية الدكتور عادل محمود
كتبت / أماني ممدوح
قالت صحيفة نيويورك تايمز إن الدكتور عادل محمود الدكتور أحد رواد أبحاث اللقاحات والأمراض المعدية في العالم توفي يوم 11 يونيو نتيجة نزيف في المخ بمستشفى جبل سيناء في مانهاتن، نيويورك، ولم ينشر الخبر إلا في 13 يونيو، بينما لم يصل الخبر للإعلام العربي إلا في يوم الأربعاء 20 يونيو، رغم مساهمته في إنقاذ حياة الملايين بالتطعيمات التي اخترعها.
ولد عادل محمود عام ١٩٤٢ في اسرة بسيطة لوالد مهندس زراعي.. عادل قبل أن يتم عشر سنوات شاف والده يتوفاه الله بالتهاب رئوي حاد… وقف مش فاهم يعمل ايه بعدما توفى أبوه وكان اكبر اخواته أصبح هو مسؤول عنهم في سن حرج …
مرت الايام على عادل والسنين الصعبة حتى تخرج من كلية طب القصر العيني بعد مرور ١١ عام على وفاة والده… وبالتحديد سنة ١٩٦٣
ومن هنا أصبح عادل يلقب “الدكتور” عادل محمود.
دكتور عادل محمود وصل منصب رئيس قسم البحوث و التطوير للقاحات بشركة ميرك الامريكية للأدوية.. ولما تسأل وتقول ايه اللي وصله للمنصب ده.. وايه المميز في كده… نقولك ان دكتور عادل محمود يا جماعة عمل انجازات ممكن يحسده عليها “لويس باستور” اللي اكتشف لقاح الكلب وعملية البسترة
دكتور عادل هو اللي انتج واكتشف لقاح اهم واخطر مرض قاتل للأطفال في القرن العشرين بلا مبالغة… وكل واحد اتجوز وخلف وعنده اطفال سمع عن المرض القذر ده وفيه كتير مننا كمان عيالهم اتخبطوا فيه وربنا نجاهم وانا شخصيا واحد منهم وحصل ده مع ولادي… فيروس “الروتا”
من حوالي ١٠ سنين الروتا ده كان اخطر مرض بييجي للأطفال في سن تحت خمس سنين واللي بتبقى اعراضه شبيهة بالنزلة المعوية
الروتا ده فيروس صعب وشديد جدا بينتقل بسهولة عن طريق الفم وموجود حوالينا في حاجات كثير… اكلة ملوثة.. خضار ما اتغسلش… زحف على الارض وايد ما اتغسلتش…
الروتا زي معظم الفيروسات مالهاش علاج… كل اللي الدكاترة بيعملوه في الحالات الحرجة هو انهم يعلقوا محاليل للطفل علشان الجسم يقدر يسترد عافيته و يقاوم الفيروس بشكل طبيعي.. ما هو مفيش علاج… هنعمل ايه؟
الروتا كان بيقتل سنويا اكتر من نص مليون طفل في العالم… والكلام ده يا جماعة سنة ٢٠٠٠ يعني مش من ٥٠ سنة مثلا…
دكتور عادل و فريقه في ميرك قرروا يحاربوا الفيرس ده وبعد ما شركة وايث كانت نزلت لقاح جريت سحبته تاني لأنه كان بيسبب مضاعفات خطيرة للاطفال في بعض الحالات… دكتور عادل ما استسلمش وقرر يحارب الروتا… وفي خلال حوالي عشر سنين كانت النتايج
انخفض معدل الوفاة سنة ٢٠١٣ الى حوالي ربع مليون طفل.. ولسة الارقام بتنخفض نتيجة العلاج اللي اكتشفه دكتور عادل محمود وانقذ بيه مئات الآلاف من ارواح الاطفال حول العالم…
طيب هل وقف على كده ؟ ابدا…
دكتور عادل كان واهب حياته لمكافحة امراض الامومة والطفولة… قرر يعمل لقاح لأخطر فيروس بيهدد حياة السيدات واسمه العلمي الـ HPV
الفيروس ده للاسف سبب اساسي لسرطان عنق الرحم… احد اسوأ انواع السرطنات المهدد لحياة السيدات في العالم..
دكتور عادل برضه اكتشف له لقاح ونجح وبيتم تطويره واستخدامه للعلاج في اهم الاماكن الطبية في العالم…
الراجل ده توفاه الله يا جماعة… توفاه الله في اوائل الشهر.. في صمت تام…
توفى من غير ما نسمع عن انجازاته او اسمه او نجاحاته اللي هزت الارض
توفى في هدوء العظماء اللي ما جريوش ورا شهرة او جاه.. انما سخروا حياتهم للعمل وانقاذ روح بشرية…
كان دكتور عادل محمود قيمة وقامة وقد نعاه الأمس “بيل جيتس” .
