ومن شر حاسد إذا حسد…..”عقدنا وانفصلنا في نفس الاسبوع” قصة واقعية

متابعة هاني حسبو

الحَسَدُ: هو البغض والكراهة لما يراه الحاسدُ مِن حُسْن حال المَحْسود، وهو مِنَ الأمراض القلبية التي تصيب بعض الناس بسبب الغيرة وعدم الرضا بقدر الله عز وجل.

والإيمان بوجود الحسد أو العَين مِن عقيدة المسلم، فقد جاء الحسد والعَيْن في نصوص الوحْي مِنَ القرآن الكريم والأحاديث النبوية الصحيحة، والأدلة على ذلك كثيرة.

قال الله تعالى: {وَمِن شَرِّ حَاسِدٍ إِذَا حَسَدَ}(الفلق:5).

عن أنس بن مالك رضي الله عنه أن النبي صلى الله عليه وسلم قال: (لا تَباغَضُوا، ولا تَحاسَدُوا، ولا تَدابَرُوا، وكُونُوا عِبادَ اللَّهِ إخْوانًا”

قصة واقعية تحكيها الدكتورة دعاء زاهر أخصائية نفسية حدثت لها شخصيا ترويها فتقول:

عقدنا وانفصلنا في نفس الاسبوع

اللي يعرفوني كويس

ومتابعني من زمان اكيد فاكرين فترة غيابي في 2022

واللي بالمناسبة محدش يعرف ليه ولا علشان اي ،

قولت احكيلكم بعد 3 سنين ونص تقريبا

في شهر4/ 2022

اتقدملي شخص كويس ،نحسبه على خير

كان ليه بوزيشن مرموق جدا ،ومن عائلة معروفة ومشهورة جدا.

المهم تم التوافق والاتفاق

والحمد لله قررنا العقد يوم 25ابريل 2022

اللي كان موافق بردو25 رمضان

اليوم دا كان يوم عادي الحمد لله

ومشي للنهاية كويس

بس زي اي حد خصوصا في الارياف،بيدعوا. الاهل والجيران لحضور العقد “كتب الكتاب”

المهم العقد كان بعد الافطار ،مع حضور كوكبة من اهل القرية

واللي هم بالمناسبة قرايبنا يعني

الشخص دا “العريس”

جاي هو وعائلته بسيارتهم الفارهه،وكل منهم بسواقه الخاص..ودا طبعا على عكس القرية والأرياف..

بدأ الهمز واللمز والكلام اللي مكنتش متوقعاه،لدرجة ان اللي حضر يكلم اللي محضرش ،ويقوله نصا

“يالهوي يلا تعالى شوف العربيات والسواقين،يالهووووي،دي مش هتشيل قشاية من الارض خدامين وسواقين ”

بالمناسبة دول رجالة يعني اللي بيقولوا كدا

نيجي بقا للنساء

تجيلي واحدة في وشي كدا وقدام “العريس”

تقولي انت وقعتيه ازاي دا..

بعد العقد مش هنسى نظرة الشر اللي شوفتها في عيون الكل خصوصا اتنين اخوات كدا لحد الان مش بنسى نظرة عيونهم اللي مليانة حقد وحسد .

عدى يوم العقد ،افاجئ تاني يوم بتعب مش قادرة اتحمله

علشان اروح اكشف ،الدكتورة تقرر عملية حالا،عملت العملية وخرجت

وروحت البيت،علشان تاني يوم تحصل مشكلة كبيرة ،جدا

وابتدي ادخل في صدمة عصبية غير مبررة ،افقد على آثرها الذاكرة لمدة سنة ونص وزيادة

كل اللي افتكره في حياتي القرآن والصلاة..

لا بمشي ولا بتكلم ولا عارفة حد ولا اي حاجة في حياتي اصلا

يمكن حتى الاساسيات مش عارفاها.

وبعد لف كتير على كل الدكاترة ،اللي يشخص صح واللي يشخص خطأ.

وبعد كل دا ،ماما تقرر تجيب سوؤر كل من كان في العقد ،واغتسل بيه ،علشان ابدأ افوق وارجع شوية بشوية.

بالمناسبة انا قعدت سنة ونص تقريبا بشوف عيونهم في جسمي ،بصرخ بشكل مفاجئ غير مبرر ..

اه نسيت اقولكم ان تم الانفصال بدون بناء في نفس اسبوع العقد..

الحسد ،والعين حق

حصنوا اولادكم وانفسكم ،واموالكم ..