خطة للدعاء
ناس كتير بتشتكي من انها ما بتعرفش تدعي أو تنظم دعواتها !
عاوز أنصحكم بنصيحة اتعلمتها من محاضرة عن مهارات التأليف !
المحاضر كان بيقول : لما تيجي تألف كتاب ابدأ بالعنواين الرئيسية ! افتح صفحة واكتب العنوان الرئيسي ، وبعدين سيب عدد من الصفحات واكتب العنوان اللي بعده ، وهكذا ! بعد ما تخلص ، افتح صفحة كل عنوان رئيسي انت كتبته واكتب تحته كل اللي يجي في بالك (تحت هذا العنوان) !!
وكذلك الحال في الدعاء ، انا جربت تجربة ولقيتها مفيدة جدا !
لما أجي أصلي ركعتين مثلا (فيهم 4 سجدات) كنت بقسم دعواتي لأربع أقسام بأربع عنوانين مختلفة :
السجدة الأولى : دعوات للآخرة فقط ، مثلا : الدعاء بالتقوى ، حفظ القرآن ، العتق من النيران ، رفقة النبي محمد صلى الله عليه وسلم في الجنة ، الإخلاص ، إصلاح القلب ، غض البصر ، حسن الخاتمة ، الاستعمال لنصرة الدين ، وهكذا .
السجدة التانية : دعوات للدنيا (بالتفصيل) : الزوجة الصالحة ، الذرية الصالحة ، التوفيق في العمل ، تجديد السيارة ، زيادة المرتب ، البركة في المال والوقت ، مثلا : العربية باظت تتصلح بسعر معقول ! إبني مثلا يحل كويس في الامتحانات ويجيب مجموع ، وهكذا .
السجدة الثالثة : الدعاء للأهل والأصدقاء (بالأسماء والتفصيل) : الدعاء للأم والأب والاخوة وأفراد الأسرة بالتفصيل ، الدعاء لصديق إنه يتزوج ، وآخر إنه يخلف ، وآخر انه يسد دينه ، وآخر إنه يترقى في شغله ، وواحد – بعيد عن ربنا – بالهداية ، وواحدة بالحجاب ، وواحد مريض بالشفاء ، وواحد متوفى بالرحمة والغفران ، وهكذا .
والسجدة الرابعة : الدعاء للأمة الإسلامية : بتحرير الأقصى ، بنصرة المجاهدين في كل مكان ، بزوال طواغيت العالم واحد واحد بالاسم ، بالتمكين للدين ، برحمة المستضعفين في بورما وافريقيا الوسطى والصومال وغيرها ، بزوال الغلاء والبلاء ، برفع الغمة ، وهكذا …
لما تخلص بقا ، تلاقي نفسك بفضل الله دعيت دعاء شامل متكامل إلى حد كبير !
لإن ميزة الدعاء المتقسم بالعنواين ده إنك لما تلزم دماغك بعنوان معين بتلاقي مخك بيجتهد إنه يفتكر كل التفاصيل تحت هذا العنوان ! إنما لو الدنيا مفتوحة كدة هتلاقي نفسك بتدعي دعوة لنفسك وبعدين دعوة لأمك مثلا ، وفجأة تفتكر فلسطين تقوم داعي دعوتين ، شوية وتفتكر صاحبك المريض تقوم داعي ، بعدين ترجع تدعي لنفسك دعوة دنيوية ، يقوم الشيطان يقلك هتدعي للدنيا وتسيب الاخرة تقوم تسيب الدعوة تنط لغيرها !! وتقعد مشتت كدة لحد ما الوقت يخلص وانت ما أنجزتش !!
جرب امسك ورقة وقلم واكتب العناوين الأربعة أو الخمسة أو العشرة زي ما تحب ، وابدأ اكتب تحت كل عنوان ما تتمناه نفسك من خير الدنيا والآخرة ، عشان لما تيجي تدعي ما تضيعش وقت كتير في السرحان واستجماع العقل والقلب !
حاول تنزل تصلي العصر في المسجد ، وبعد صلاة العصر تقرأ قرآن لحد قبل المغرب بساعة ونصف، بعدها تبدأ تقول أذكار المساء بهدوء واستحضار للقلب وتركيز في المعاني ، الأذكار دي هاتدخلك في مود الدعاء ، تقوم بقا مطلع اللستة بتاعتك اللي انت محضرها وتدعيها
ماتنساش تبدأ الدعاء دايما بحمد الله والصلاة على رسوله صلى الله عليه وسلم
من اختيارات الكاتب الصحفي محمد يوسف رزين
مدير تحرير وكالة انباء الشرق الأوسط
