طلاب الثانوية العامة…الحلم حيستناكم
من اختيارات أ.د.نادية حجازي نعمان
مجموعك في الثانوية
لو فوق تسعين ف المًية
أو حتى إن شلت مواد
عمره ما حيقيم عقلك ، ولا هوه نهاية العالم ، لو حتى نقص أو زاد
ماتقولش خلاص اتقفلت والدنيا بحالها اسودت
أهي سنة قضيتها في عمرك
وخلاص دلوقتي آهي عدت ما تقولش حياتك وقفت
ولا الحلم خلاص إتبخر
الخير متشالك دايمًا
و حييجي ولو متأخر
الجاي بتاعك كله
بالحلو وبرضه بمره
صدقني حتدخل جامعة
وتتمنى نجاحك صافي
وتعدي السنة ما تشيلش
يامه ناس وياها شهادة
على طول قاعدين ع القهوة
والحلم إتسرسب منهم
عجزوا وانتهوا على سهوه
وفيه ناس حاولت ف حياتها
جددوا فيها من تاني
وابتدوا وفتحوا مشاريع
وفيه ناس كملوا واجتهدوا
أو ذاكروا وخدوا كورسات
اشتغلوا ف مناصب عالية ودلوقت أصحاب عقارات إنت إللي بإيدك تنجح بطريقة جديدة تناسبك وتكون بتحاسب نفسك
قبل الناس ما تحاسبك
والوقت إن جاب أو ودى
كلها درجات في المادة والثانوي خلاص أهو عدى والعمر بحاله معاك
بس إنت تعيش بتحاول
والحلم حيستناك .
٢٠٢١/٧/٢٢
( عن فيديو إبراهيم فرج )
