من القلب للقلب .. اللى اتلسع من الشوربة
بقلم / أمل الوكيل
اللي اتلسع من الشوربة …… منتهي الغباء انه ينفخ في الزبادي .
أيوة ليه تنفخ في الزبادي , ليه خوفك من تجربتك مع حاجة قاسية وتعبتك وسابت أثرها السيء فيك يخليك ماتقدرش نعمة الحاجة اللينة المريحة
لو اتلسعت من الشوربة اتعامل بحذر مع الشوربة في اللي جاي .. انما تنفخ في الزبادي ليه و هي ممكن جدا تهون عليك لسعة الشوربة .
ماتسيبش لسعة الوحش تعميك عن طبطبة الحلو ..
ربنا بيبعت الاختبار عشان نتيجته تكون حسب فكرك و اختيارك .. لكن مش مفروض تفضل تتعامل بنفس الأسلوب مع كل اللي يقابلك بعده .
من حقك تاخد حذرك وتتعلم من لسعة الشوربة .. لكن تبقي غلطان لو بخوفك خسرت نعومة الزبادي وفايدتها .
اتعلم من الصعب لكن ماتخافش من سهل يجي في طريقك … يمكن ربنا بيعوضك … ويمكن كان اختبار و انت نجحت فيه .
ماتخسرش بكرة بخوفك من إمبارح .
لسعة وعدت
وماتنفوخش فى الزبادى
وماتخافش من بكره
