من القلب للقلب .. تعرف ايه عن التخلى يامرسى؟

بقلم/ أمل الوكيل

عندك ثقافة التخلي؟!!!

أغلبنا اتربي علي عكسها…..

ابسط الأمثلة :

خلي البرطمان ده هينفع

خلي الكتب دي، اكيد ولاد ولادكوا هيحتاجوها…

التيشيرت ده هينفع لابن اخوك بعد عشر سنين…

علي الرغم من سلامة وجمال النية، الا ان الثقافة دي ضرتنا كتير… و ضررها بقي اكبر من نفعها

بداية من :

حرام المجموع ده، ادخلي كلية مجموعها عالي..

حرام العريس ده، مش هنلاقي زيه بعد كده

الكام سنة اللي ضاعوا، لازم نكمل في اللي شايفين انه مش هينفع….

الأسلوب ده اتزرع جوانا، وخلانا نتمسك بأشياء وفي بعض الأحيان أشخاص الضرر منهم بقي كبير…

لان ما اتعودناش نسيب..

ما اتعودناش نعلي قيمة دلوقتي و بكرة عن قيمة امبارح…

كل ده خلي اتخاذ القرار صعب….

من أبسط الأمثلة في المعاملات اليومية وصولا للقرارات المصيرية…

شايف نفسك فين من ده؟

لو انت بعيد قوي، ابتدي من الحاجات البسيطة..

ابتدي من الأمثلة البسيطة في المعاملات اليومية :

لو دخلت فيلم وما عجبكش، امشي من نصه عادي..

لو اشتريت كتاب، و مش قادر تكمله، سيبه….

قدر قيمة وقتك و مشاعرك لأنهم اكيد اهم من اللي اتدفع قبل كده….