كلام ستات وشوية تكات..خليكى ناصحه
كتبت / عزه السيد
اوعي تعملي كده خليكي ناصحة
اوعى تغسلي الخضرة بعد ماتقطعيها لانها هتفقد نص الفيتامينات اللي جواها اغسليها الأول وبعدين قطعيها
اوعى تغطي الحلة كلها وانتي بتطبخي لأن الخضار هيتأكسد ويغمق لونه
اوعى تطبخي الخضار مده كبيرة عالنار خلي تسويته مظبوطة عشان تحتفظي بفوائده
اوعى تقطعي الفواكه أو الخضار قطع صغيرة لأن الفوائد بتاعتها هتقل قطعيها بحجم كبير هتبقى مفيدة للصحة والأسنان
اوعى وانتي بتطبخي خضار مجمد تحطيه في الحلة على النار على طول لازم تحطيه في التلاجة شوية عشان ثلجه يذوب كده هتحافظي علي قيمته الغذائية أكتر
اوعي تحطي ملح علي السلطة قبل الأكل بفترة كبيرة لأنه هيخلي الخضار يذبل وينزل مايته حطيه قبل الأكل علطول
اوعي وانتي بتطبخي البامية أو الفاصوليا الخضراء توطي النار خليها علي نار عالية في الأول تغلي غلوتين وبعدين وطي النار عشان متسودش
