من القلب للقلب

بقلم: أمل الوكيل

الكلمة الحلوة

– بكره أوي الناس اللي مبتقدرش الامور صح، اللي بيستصغروا حجات مهمة ويستهيفوها وفاكرين انها مابتفرقش رغم انها بتفرق .. كام علاقة فسدت بسبب ان شخص كان عيان والتاني مسألش ومهتمش؟؟ كام علاقة فسدت بسبب ان زوجة تعبت وزوجها مأخدهاش كشف عليها وسابها تروح مع مامتها او مامته او اختها وفاكر القصة عادي.

– علاقات كتيرة بتفسد بسبب قلة الكلمة الحلوة، او ان مفيش روح متمثلة ف ضحكة وصناعة موقف يلطف الجو كل يوم .. بسبب ان ست ماقدرتش تعب جوزها اللي راجع من الشغل تعبان ونفسه ف شوية راحة بعد تعب يوم طويل، او ان راجل كل ما يدخل بيته يسفّه ويتفَّل من تعب زوجته طول النهار في البيت ومع أولاده ويحسسها انها مبتعملش حاجة.

– و الكلمة الوحشة، الكلمة الوحشة، الكلمة الوحشة .. دي اكتر الحجات اللي بتخرب العلاقات .. الشخص المدب اللي قاعد كل شوية يحرق دم شريكة بكلمة (انت تخنت، بتاكل كتير، شكلك فيه و فيه و فيه، انت ملكش لازمة، اهلك فيهم و فيهم) لأ وتلاقي الكلام اللي بيحرق الدم ميظهرش الا قبل الأكل.

– ماارتبطناش بيكم عشان تحرقوا دمنا، كفايا ان العيشة وحدها مرة ف متخنقوناش اكتر.. سمعونا كلمة حلوة، عاملونا بما يرضي الله عشان تهونوا علينا بدل ما نكرهكم زي ما كرهنا العيشة.