كتبت عزه السيد
عن لحظة بتستسلمى فيها للوجع
بتسلمي أمرك لله وانتي بتحطي رجلك على عتبة غرفة العمليات
عن نظرتك للدكاتره والتمريض اللي بيستقبلوكي وهتحطي حياتك بين اديهم وانتي بتقولي جواكي يارب
عن اول طلعه للسرير والرعب خلاص مخلي جسمك ييرتعش وانتي شامه ريحة البيتادين والبنج وكل اللي بدأتي تسمعيه صدى صوت
لما خلاص كل اللي شايفاه قدامك وهما بيوضبوكي للولاده النور اللي ضارب ف وشك
عن كل لحظه بتعدى ف حياتك وانتي بتبتدي تتبنجي
خلاص شغااالين … بيشقو اول شقه والتانيه والتالته لحد سابع فتح جرح عشان يوصلو للبيبي
شد وعجن وعصر وتنضيف وخياطه وابر وكل ده وانتي مسلمه امرك لله ونايمه
تيجي بقى تفوقي على اصوات حواليكي … (حمدلله عالسلامه ياحببتي) ..( البيبي زي القمر ) … ووسط الاصوات دي اصوات بتحب تحط التاتش بتاعها ( شبه مين ده لالالا مش شبهنا ده شبه !!!.**** ويجبولك اسامي الاجداد والفراعنه اللي ف عيلتك اللي هما ماشفهمش اساسا وانتي كل ده
نايمه
نايمه مش قادره تقولي آه .. مش قادره تتوجعي من كتر الوجع
وفجأه ييجي وقت التنضيف …تخش عليكي ممرضه تفعص وتعجن ل تاني مره عالجرح والمره دي عالصاحي وانتي حاسه
ومش هقدر اوصف كميه الوجع ف كلمه ..اللي جربو عارفين
ويجيلك واحد ظريف يقولك ( ايه كل ده هي بتدبحك ) اه على فكره بتموتني وجع ياراجل ياللي عشره زيك ميستحملوش دور برد ييرقدهم فالسرير
ساعه مايجيلك الامر بقى انك تقومي تمشي ياااااااه
لا تعليق عن كميه الوجع والألم
يعدي اسبوع الالاااام بمنتهى الوجع لحد ماتبدأ تفوق وخلال الاسبوع ده بتقوم وترضع وتسكت وتهشتك
دي مره واحده ولاده مابالك باللي بتولد مره واتنين وتلاته عشان خاطر تعمل عزوه وتثبت ل جوزها حبها ليه
وييجي راجل معندهوش اي احساس يقولها انتي عملتي عشاني ايه يعني وفيه اللي بيقل منها وفيه اللي عايش يخون وفيه اللي بيضربها كمان
تحيه للست اللي مفيش راجل يقدر يستحمل اللي هي بتعمله
دي ولاده بس ..مابالك بالتربيه واهتمامها بيك دون مقابل ولا اجازه ل نفسها ولا كافتريا تقعد عليها مع اصحابها