صنم لم يزل يعبد حتى الأن
كتبت : عزه السيد
زمان كانت الناس بتعبد اصنام كتيره يروح صنم ويجى صنم تانى ، الاديان نزلت علشان توصل عقول الناس وتفهمهم أن الأصنام دى لا بتنفع ولا بتضر ،يعنى زى قلتها وبالعكس عدمها احسن من وجودها.
سيدنا ابراهيم عليه السلام لما دخل المعبد كسر كل الأصنام وساب واحد كبير وعلق في رقابته الفاس، جم قومه لابو الإله بتاعتهم متكسره استعجبو وسألو مين عمل كده، وافتكرو سيدنا ابراهيم،جابوه وفتحو معاه محضر وتحقيق وسألوه مين اللي عمل كده قالهم وانا أعرف منين إسئلوهم فقالوا يا ابراهيم انت عارف انهم مبسمعوش ومبيتكلموش حد يعبد إله لا بيسمع ولا بيتكلم، قوم سيدنا ابراهيم بصو لاقو كبير الاله معلق في رقابته الفاس وهو الوحيد اللى متكسرش بصو لسيدنا ابرهيم وبصو للصنم اللى فاضل ورجعو يسألو سيدنا ابراهيم يا ابراهيم مين اللى عمل في الهتنا كده رد سيدنا ابراهيم وقال ماتسئلوه مايمكن هو اللى عمل كده اهو الفاس معلق في رقابته جايز قام على بقية الأصنام وكسرهم، قالو يا ابراهيم متسخرش مننا كبير الإله ده لا بيقدر يتحرك من مكانه ولا يقدر يمسك فاس ولا يقدر يكسر حاجه، قالهم حد يعبد إله لا يقدر يتحرك من مكانه ولا يقدر ينفع ولا يفيد ولا يضر
عبادة الأصنام انتهت تقريبا من العالم لكن فيه صنم واحد لسه مستعصى على الهدم لسه عايش رغم أن الدنيا اتطورت واتقدمت صنم إسمه الفلوس والدخل الصنم ده لسه موجود عند ناس كتيره لسه موقعش لسه موجود فتنه للناس واختبار ليهم
كتير من جرائم القتل سببها الفلوس
كتير من الفساد الموجود فى الأرض سببه الرغبة في الحصول على الفلوس
كمن الحروب اللى حصلت في العالم سببها مادى للإستيلاء على ارض فيها معادن او بترول
الفلوس فتنه كبيره اوى مابينجاش منها إلا الانسان اللى عارف حقيقه الدنيا وعارف إنها لهو ولعب وزينة وتفاخر ، لو بصينا في حقيقة الفلوس هنلاقى ايه ؟ الفلوس ممكن تشتريلك فطيرة وممكن تشتريلك عربيه وممكن تشتريلك قصر او طياره او يخت ، لكن الفلوس متقدرش تشتريلك الصحة ، متقدرش الفلوس تشتريلك إحترام الناس متقدرش تشتريلك العلم ولا تقدر تشتريلك السعادة.
الفلوس مهمة ومطلوبة والسعى للرزق مطلوب وواجب ،لاكن في حدود إنك تخلى الفلوس خادم توجهه مش سيد يوجهك.
