أراء وقراءات
علشان تبنيها
كتب احمدابراهيم
بلغنى ايها الملك السعيد
ذو الرأى الرشيد
كان فى زمان ملك لمدينة
بشوش وحنين وابن لذينه
ضاقت حبة الدنيا معاه
حظه منيل يا ولداه
كانت ميزانيته يدوب على القد
كام مليار من بنك النقد
قال والله دى مش عيبه
من اول بكره لابد ضريبه
تضحك تبكى لازم تدفع
ده فى مصلحتك وكله هينفع
ضاقت حالة الناس بزياده
وزاد الهم وأصبح عاده
كله كان مهموم وحزين
إلا الصفوه والفنانين
قالو بالحب معاك نبنيها
ده انت حاميها من حراميها
ومهما الشعب يا سيدى يجوع
ده كلام فاضى مش موضوع
مادام احنا وياك فى سعاده
ليك فى رقابنا يا سيدى شهاده
بانك قائد فوق الوصف
وان رياحك بتعصف عصف
بكل الناس أعداء الشعب
وغيرك يحكمنا هو ده الصعب
وهنا ادركت شهرزاد الصباح
فسكتت عن الكلام المباح
وقالت للملك شهريار
ان خير الناس أنفعهم للناس
وليس مجرد كلام ليس له اساس
والى اللقاء
