للرجال فقط ..بلاش تتجوز
بقلم / أمل الوكيل
#للرجال: بلاش تتجوز
اه والله لو سمحت بلاش تتجوز لو:
ناوي ما تصرفش على البيت كله (مش انت النص وهي النص، مش بيت طلبة هو)
لو فاكر ان من حقك تضرب مراتك (ومحدش يقول لي الضرب في القرآن غير لما يقرا تفسير الضرب يعني ايه وتفسير النشوز يعني ايه)
لو مش ناوي تسمع حكايات مراتك ( من حقها انها تلاقي حد تفضض معاه، وصدقني تفضفض معاك أحسن ما تفضفض مع أمها او صاحبتها، او اي حد تاني)
لو مش ناوي تستحمل شوية نكد وزن (الستات بتحب الرغي والزن لانها بتشوف الحاجات بتفاصيل اكتر بكتير منك)
لو فاكر ان البنات طول الوقت حلوة (لا حيجي وقت تتخن، توحش، ويطلع لها شنب و و ، ودورك انك تحتويها وتفهمها انك بتحبها)
لو فاكر ان العيال مسؤولية امهم؛ العيال مسؤولية والديهم(الاثنين) مش امهم بس
٧- لو مش ناوي تطلع كيس الزبالة وتغسل المواعين (هي دي القوامة، انك تقوم بالمهام)
لو حتسمع كلام أمك أو مراتك أو أخواتك وتمشي ورا اي حد فيهم (دورك انك تسمع للكل وتراضي الكل من غير ما تيجي على حد فيهم
لو ناوي لو لا قدر الله اتطلقتم تطردها من الشقة (انك تكتب الشقة باسم ابوك أو اخوك أو حركات التحايل على ربنا )
لو مش ناوي ترحمها وتعدي غلطاتها زي ما عايزها ترحمك وتعدي غلطاتك،
لو مش ناوي “تمثل” الاحتواء، اه تمثيل الاحتواء اهم حاجة، لانها محتاجة تحس بأهميتها عندك
- لو مش مستعد تقول آسف، حتى لو مش غلطان
لو مش مستعد تتعلم تكون زوج وأب (مش معنى انك اتجوزت انك بقيت زوج صالح، ولا معنى انك خلفت انك بقيت أب صالح)
لو مش حتخلي أصحابك مش هم الاولوية، وبيتك هو الاولوية
لو حتطبق الشرع في حقوقك ومش في واجباتك
لو مش مستعد تحسن من نفسك علشان تعجب مراتك (زي ما عايزها تعمل اعمل)
