عن أى أم أكتب وأقول
كلمات الشاعر /الشحات عبد الحليم النقيدى
عن أى أم أكتب وأقول
وارجع أعيد؟
عن أم ربت لينا شالت
واللا أم ما مرة قالت
للولاد الجوع مفيد ؟
فيه أمومة للرضاعة
تفتدينا من المجاعة
فيه أمومة مش صناعة
كل ساعة الشوق يزيد
عن أى أم أكتب وأقول
وارجع أعيد
……….
النهارده عندى أمى
عيدها مارس
ومعاها أمى اللى قلبى
فيها دارس
مصر طبعا اللى ربى
ليها حارس
بادعى ليها كل لحظة
تبقى وسط اولادها عيد
عن أى أم أكتب وأقول
وارجع أعيد
………
باعتذر لك يللى شيلتى
يللى رضعتى الحنان
مهما قلنا ومهما عيدنا
حبك انتى فى المكان
بس مصر كبيرة واحنا
نبقى ليها ف كل محنة
مهما جينا واللا روحنا
ليها روحنا ان حتى قالت :
هات مزيد
عن أى أم أكتب وأقول
وارجع أعيد
………..
مليون تحية لأمى مصر
وقلبى ده أجمل هدية
لو أى محنة بتتعصر أشواقنا عصر
ما نرضى ليها المحنة ديَّه
هىَّ أزمة وراح تعدى
والدمع ح يخاصم لخدِّى
والنيل بخيرُه يروح يودِّى
حُب وردى فى النشيد
عن أى أم أكتب وأقول
وارجع أعيد
