إعذرونى

• كتب:محمد بهى

أعذرونى علشان بكتب بالعامية
بعد ما تاهت منى الحروف الهجائية
ومن عذابى فى حبى نسيت الابجدية
بس اللى مصبرنى انى بكتب بالعربية
قولولى أعمل أيه مع حبيب عنيا
بيقولى علم قلبك يكون تقيل شويه
وبلاش اللهفة والغيرة دى عليا
وكفايا أشوف عنيك وحبها ليا
أو أسمع صوتك وهو بينادى عليا
وأحس بحنانك فى لمسة أيديك لأديا
قولولى أعمل أيه علشان أنا فاض بيا
ما أنا قلبى مليان شوق وحنية
وأنا فى حبى معنديش وسطية
وعيونى حلفت ما تشوف غيرها هى
ما هى حلم عمرى وسنينى الجايه
وفى ضحكتها ترقص الدنيا حوليا
قولولى اعمل ايه بس بشويش عليا
وقبل ما تحكموا شوفوها بس بعنيا
وان قولتم انى فى حبها غلبت مجنون ليلى
فما أحلى الجنون بقلبها وكمان ارضاه ليا
وان كان قتل قلبى هو حكمكم عليا
انا موافق ومن غير ديـــــــــــــــــــة