الشاعر النقيدي يحتفي بأمه .. أمى غير الأمهات

لمأ أحب أكتب عن أمى

مش ح أقول زى اللى قالوا

مش ح أرُص كلام شبههم

أمى شئ وما فيش مثالُه

أمى غير الأمهات

أمى هى الأمنيات

أمى الأمل يصحى يبات

عارف القلب وما جالُه

…..

يعنى إيه اكتب عن أمى

كام قصيدة وكام ديوان ؟

أمى دى فى الكون فريدة

شئ ونادر فى الزمان

ح اقعد احكى لما كنا زمان صغار !!

كات مروءة وكات شعار

كات ست دار

كات تحس بأى واحد وقت آه

من غير رسايل كات تكون لحظه حداه

كات تطبطب كات تطيِّب

كات بتدعى كلام وطيِّب

ربنا منها قريِّب يستجيب يرفع بلاه

وقت ما الناس يستحالوا

………

أيوه أمى مش شبيهة لحد تانى

واوعوا حد يقول أنانى

أمى لو تحضر زعلنا

لحظة بتروق القنانى

أمى بلسم لاجل تطييب الجروح

أمى روح

أمى لو لحظة تروح

بعدها نفضل نعانى

أمى هى قاموس محبَّة

نلقى فيه كل المعانى

أمى نسخة ما فيه فى نوعها حد تانى

ربنا سخرها لينا

تبقى دى فرحة زمانى

أمى دى محطة سعادة

آه يا سادة

أمى لسَّاها الوسادة

للكبير فينا وعيالُه

لما أحب أكتب عن امى

مش ح أقول

زى اللى قالوا

…….

لما أحب اكتب عن امى

بالقى بتعاند حروفى

آه يا خوفى

يللى عارفانى وظروفى

يللى بتحسى بدواخلى

وقت لمسة من كفوفى

كل عيد وانتى ما بينَّا

زاينة بوجودك حياتى

تبقى فرحة مالية عينَّا

حضن ليا أنا وخواتى

عمرنا عندك ما هُنَّا

وانتى بدر جميل يوماتى

ده اللى يكسب ود أمه

تبقى جنة مكتوبالُه

لما أحب اكتب عن أمى

مش ح أقول زى ما قالوا

———————-

الشحـ النقيدى ــات