كلام ستات وشوية تكات
كتبت / عزه السيد
لما تيجى تعملي فراخ بانيه او بوفتيك افردي كيس بلاستيك وحطى عليه البقسماط والتتبيلات وتبلي عليه وبعدين لما تخلصي لمى الكيس وارميه على طول كدة هتوفري غسيل طبق كمان هتحمى حوضك من الانسداد بسبب البقسماط اللي بيقع في الحوض اثناء الغسيل
لو وقعتى زيت على الارض متجريش تجيبى فوطة وتمسحيه لا رشيى عليه ملح وسبيه دقيقتين تلاتة وبعدين اكنسية بالمقشة والجاروف واتفاجئي بالسحر ولا اكن في حاجة وقعت
حطى معلقتين قهوه في كوب صغير في اى مكان بيطلع روائح غير مستحبة زى الجزامات والتلاجات والفريزر و اى ضلفة مطبخ او خزين بتسحب كل الروائح تماما
لما يقع منك بيض على الارض او على التربيزة بيض نى طبعا اوعى تمسحيه بفوطة لا امسحيه بمنديل كلينكس وارمى على طول لان الفوطة بتبقى ريحتها وحشة اوى لو مسحتى بيها بيض حتى بعد الغسيل وكذلك اللبن
ما تمسحيش رخامات المطبخ بالكلور امسحيها بنقطه من الخل بيقتل الجراثيم وبيقضي علي اي بكتريا
لو عندك حاجة نحاس متجبيش نحيتها مايه بنص ليمونة واغسليها هترجع جديدة
لو عندك مكواه بخار وحاسة ان كفائتها قلت حطى في خزان الماية خل وسخنيها وسبيها ربع ساعة في الفيشة على اعلى درجة وبعدين اضغطى على دافع البخار لحد ما يتبخر كل الخل حتلاقي طلع حاجات كدة زى الطين ودى رواسب الماء لما بيغلي ويتبخر وكررى الطريقة مع مايه عادية مرتين لشطف خزان الماء وفوطة مبلولة امسحى الرواسب اللي خرجت حتلاقيها رجعت جديدة
عاوزة عيون البوتجاز الاستانلس تبرق انقعيها مع قشر ليمون ومايه سخنة في طبق وبعدين بصابونة وش اي نوع لوكس او كامى او اى حاجة حطى منها حته على ليفه واغسليها حترجع جديدة
لبسي الباسكت اللي في الغرف اكتر من كيس فوق بعض بحيث يتملي واحد تشليه تلاقي واحد مكانه وبكدة توفري وقتك في تغيير الكيس كل يوم
دايما خلى عندك فرشة بإيد وهاتى علبة شاور جل او شامبو فاضيه وحطى فيها سائل تنظيف و كلوركس وانتى بتغسلي وشك الصبح حطى شوية سائل واغسلي الحوض في اقل من دقيقة بقى زى الفل
اول ماتصحى الصبح وقبل ما تخرجي من اوضتك اعدلي ملاية السرير والمخدات وبكدة تكونى خلصتى من مهمة يومية من غير ماتخدي بالك
وانتى واقفه تعملى الشاى ولا النسكافيه على ما الماية تغلي روقى درفة واحدة في المطبخ تكون عاوزة تتظبط
