المعنى الحقيقي للنجاح … لمن نقول ألف مبروك ؟

بقلم / بقلم الشحات النقيدي 

لكل أب وكل أم ابنهم أو بنتهم نجحوا النهارده بأى مجموع بدون تدخل وتحريض على الغش وعرض مغرى لأخذ حق الغير والمساعدة بالطرق غير المشروعة

أقولك مليون مبروك

اللى ابنه أو بنته نجحوا بمجهودهم وجابوا أى مجموع من غير ما يبص لزميله أو يجيب إجابات من ده وده

أقوله مبروك

النهارده كل واحد يراجع نفسه ويشوف النجاح جه ازاى ؟

ما وقفتش قدام اللجنة وأرهبت المراقبين وعملت قلق وكان نفسك التليفون والسماعة والبلوتوث والكتاب والمراقب والكل ملك إيده ؟

لو ده ما حصلش أقولك مليون مبروك

النجاح مش رقم على شهادة

النجاح أمانة

النجاح مبدأ

النجاح أخلاق

النجاح عقيدة وعلاقة بين العباد ورب العباد

لا يشترط فى النجاح أن يكون الترتيب الأول ، فكثير كانوا أول ولم نعد نسمع عنهم شيئا

النجاح الحقيقى هو إثبات الذات فى أى مكان وفى أى مجال

من قلبى مليون مبروك لمن نجح نجاحا نقيا

أما من ارتضى النجاح الملوث أقول لك : غدا ستحصد ما زرعت

ابنك ح يبقى دكتور ويبعك ويسكن بعيد وماعدتش تشوفه وخيره يبقى لنفسه،

أو ح يبقى مهندس ويسافر ونادرا ما يتصل بك بحجة ضغط العمل وتنتظر منه سماع الصوت ما تلاقيه ،

أو بنتك تتجوز ويكون خيرها لغيرك،

وانت تقعد بحسرتك وذنبك اللى انت عملته علشان توصلها  أو توصله بالغش والتدليس.

ده انت ممكن ابنك يكون دبلوم واللا صنايعى واللا شغال عمل غير منتظم وبار بيك وبيخاف عليك علشان ربيته صح وبعدته عن الحرام

((وَلْيَخْشَ الَّذِينَ لَوْ تَرَكُوا مِنْ خَلْفِهِمْ ذُرِّيَّةً ضِعَافًا خَافُوا عَلَيْهِمْ فَلْيَتَّقُوا اللَّهَ وَلْيَقُولُوا قَوْلًا سَدِيدًا)) (الآية 9 سورة النساء)

مليون مبروك لكل من تعب واجتهد وحصد نتاج جهده

وفق الله الجميع لما يحب ويرضى

ليس منقول ، إنما خبرة وفرز عقول ، أتمنى أن يكون كلام معقول

الشحــ النقيدى ــات

معلم وشاعر