حسدوا الغجر على ضل الشجر

كتبت/عزه السيد

شفيقة قاعدة تتفرج على المسلسل هي وعمتها بهية

فجأة دخلت بنت صغيرة جايبة طبق فيه حلويات وبتقول لها أمي بتسلم عليكي يا ستي بهية وبعتالك الطبق ده عشان أبويا جه من السفر

شفيقة سألت عمتها بنت مين دي يا عمتي بهية

قالت لها دي بنت متولي جارنا هنا … راجل شغال في السعودية ومبسوط وربنا موسعها عليه … لسة نازل أجازة من كام يوم كدة … استنى وأنا هأرر لك البت واعرف لك كل حاجة

بهية قالت للبت … جايبة منين الفستان الحلو اللي لابساه ده يا فرحة ⁉️

قالت لها ده أبويا جايبهولي من السعودية يا ستي بهية

قالت لها وجاب لأمك واخواتك إيه⁉️

قالت لها جايب لهم هدوم حلوة خاالص

قالت لها ومجابش دهب لأمك ⁉️

قالت لها جاب لها خاتم شكله حلو خالص

قالت لها أمك يا بت مفيش واحدة متدلعة زيها  لا ليها حما ولا عمة، وعايشة حياتها بالطول والعرض ونسوان العزبة كلها حاسدينها على الهنا اللي هي فيه

شفيقة قالت لها حسرة عليا وعلى بختي

ده المنيل عبدو جوزي مجبليش حتى خاتم فالصو من يوم متجوزني

بهية قالت للبت واتغديتوا إيه بقى النهاردة

قالت لها اتغدينا محشي وبط أصل أبويا بيحبه

قالت لها طب اسمعي يا فرحة … خدي الجنيه ده هاتي بيه حلاوة واوعي تجيبي سيرة لأمك عاللي سألتك عليه … سامعة ‼️

قالت لها حاضر يا ستي بهية  وخدت الجنيه وجريت عالدكان وهي فرحانة

ليه كدة يا حجة بهية انتي وشفيقة

حتى العيال الصغيرة مسلموش منكم

استنطاق الأطفال( تسحبوهم في الكلام) علشان تعرفوا أسرار البيوت ده حرام

النبي صلى الله عليه وسلم قال :

*«مَنْ تَسَمَّعَ حَدِيثِ قَوْمٍ وَهُمْ لَهُ كَارِهُونَ ،صُبَّ فِي أُذُنيِهِ الْآنُكُ يَوْمَ الْقِيَامَةِ»*

*الآنُك هو: الرصاص المُذاب*

يعني اللي بيعمل كده هيتصب في ودنه رصاص سايح يوم القيامة

قال الإمام الصنعاني رحمه الله:

*«ويلحق باستماع الحديث.. استخبار صغار أهل الدار عن ما يقول الأهل والجيران من كلام أو ما يعملون من الأعمال »*

هتستفيدوا إيه لما تعرفوا فلان لبس إيه ولا جاب لمراته إيه ولا كلوا إيه ⁉️

يعني ليه تجيبوا لنفسكم غضب ربنا وعذابه في حاجه ملهاش لازمة ولا تخصكم⁉️

ليه تكشفوا ستر البيوت وتحسدوا وتحقدوا على غيركم

وانتوا مش عارفين فيهم إيه لمجرد الكلام والحكايات

وانتي كمان يا شفيقة مش راضية بحياتك ولا جوزك، وبصة لغيرك بالرغم إنك في نعم كتير بس مش حسة بيها

بصيتوا بعين الحسد والغيرة لهدية بسيطة جايبها واحد لمراته، ومتعرفوش هو بيتعب في شغله قد إيه، ولا هما متحملين إيه ⁉️

اتقوا الله وخليكم في حالكم وسيبوا الناس في حالها

شفيقة : خلاص يا ختي عندك حق والله

على رأي المثل (حسدوا الغجر على ضل الشجر)

الله يهديكي يا شفيقة