كلام ستات وشوية تكات
كتبت/ عزه السيد
شويه نصائح لست البيت الشاطرة
– عندك حلل الومنيوم لونها بيغير عايزة ترجيعها تانى يلا شوية خل وليمون وادعكى
ولو عندك ورقة فويل كرمشيها وادعكى بيها يا قمر وبعدين مايه وصابون وشوفيها وتعالى قوليلى
– بتقشرى الباذنجان وقليه تلاقيه شال الزيت كله وشربه تعالي اقولك الحل بعد ما تقشريه رشي عليه شويه ملح وبعدين وسبيه ربع ساعه وبعدين اقليه
كلتى اكلة باذنجان بالخل والتوم يلا بسرعه حطى عودين بقدونس فى بوقك وامضغى
طيب التوم ريحته مالية ايديكى قشر الليمون وادعكى وبعدين اشطفى
بتحمرى اللحمة والسمنة بتطرطش ومشوهة ايديكى ووشك عارفة انا الشكل ده
طيب رشى شوية ملح صغيرين للسمنة
-عملتى نفسك شاطرة وحطيتى التوابل بالنظر والشطة ولا الفلفل الاسود زادوا
واتلهلب طيب حطى معلقة او معلقتين لبن ع الاكل بس يكون دافى مش ساقع
عندك ذباب كتير طيب أصيص صغير ازرعيه ريحان او نعناع
الروايح اللى بتطلع منه بتطرد الذباب
عندك نمل و عمال يفتح ويخرم شوية خل تفاح مع مايه ورشى مناطق التجمع بتاعته المنبع يعنى
– عندك مطحنة وطحنتى توابل والريحة مش راضية تروح وعايزة تطحنى سكر
اغسليها واطحنى فها شوية عيش محمص
– عندك بواقى دهنيه فى قلاية التحميرادعكيها الاول بورق جرايد وبعدين بالصابون
– الملح بتاعك بيرطب فى علبته حطى كام حبة رز جوا العلبة
عايزة تشربى شاى مظبوط هاتى برطمان ازاز وتلخبطى كم نوع على بعض بيدى لون وطعم خرافة
