شعر حلمنتيسي ( اين الوزير الحبيب )
كتب حسن القناوى
كان للملك في يوم من الأيام
وزير للأمن حبيب .. همام
لعب بديله أتسجن قوام
ولا اتكسف ولا اختشي
ومشي ممشوق القوام
وصرخنا في وشه.. دوق العذاب
نفضلنا ودانه
طلعلنا لسانه
وفص ملح وداب
زعق الملك في الحرس
في الحال هاتوه
كتتفوه .. جرجروه ..
من الآخر.. هشنق أبوه
عشان الناس تعرف اني أنا ملك لذيذ
معنديش عزيز
مش بتقولوا الوزير ده كان ستري وغطايا
يمين بالله ما تفرق معايا
المهم يكون عندي قبل ما الشمس تغرب
عيب علينا .. يكون قدام عنينا ويهرب
دوروا عليه في جيوب الناس
دوروا حتي تحت جلد الراس
دوروا في مواسير المجاري
في بطون الأسود الضواري
سجلوا كل اللي يتقال
إن كان جهر ولا سري
اقطعوا كل الحبال
حتي إن قبلكم حبل صري
المهم يحضر بأي وسيله
اتحايلوا عليه بأي حيله
وقف الحرس مكسوفين
حيل بس تخيل علي مين
كل الحيل هو اللي علمهالنا
كل الوسايل هو اللي جابهالنا
وقف الملك محتار
وقال صحيح اللي يده في الميه
مش زي اللي يده في نار
وبعد ما كان صوته زي سبع ورعد
بدل ما كان واقف قعد
وبعت مرسال للوزير
بكلام خطير
أول كلامه كان سامحني
وآخر كلامه ترجع وزير ؟
