أراء وقراءات
نوعية من الناس.. لا تخسرهم ؟!
كتبت : عزه السيد
فيه نوعية من الناس معندهمش دراع يتلوا منه .. ملهمش مالكة يعنى ملهمش ماسكة .. مالكتهم الوحيدة الإحترام والتقدير .. هتحترم وجودهم فى حياتك وتقدّر إللى بيعملوه عشانك هيدوك عينيهم ويفوتو لك كتير بمزاجهم وحط تحت كلمة مزاجهم ألف خط.
هما بيبقوا قاريين وفاهمين إللى بيحصل من وراهم بس ساكتين عشان مش عايزين يخسروك .. و لو فاكر إنك عرفت تضحك عليهم .. وقت اللزوم هايواجهوك بكل لقطة كنت فاكرهم إنهم عُبط و مش فاهمين و هتتفاجئ إنك إنت إللى عبيط .
الناس دى بتفوت مرة و إتنين بس التالتة مش هتلاقيهم .. بيمشوا وضميرهم مرتاح من غير سابق إنذار ..لأنهم عارفين إنهم عملوا إللى عليهم و زيادة .. بيمشوا وهما متأكدين إنك إنت الخسران مش هما .. طول ما هما بيعاتبوك إطمن إنت لسه غالى عندهم .. متفرحش بسكوتهم .. ده معناه إنك أصبحت لا تمثل ليهم أى شئ .
