ياااا أم العروسة
كتبت / عزه السيد
يا أم العروسة.. خدي بالك من الحاجات دي
بعد جواز بنتك، طبيعي تحبي تطمني عليها كل شوية، وتبقي حابة تسمعي صوتها دايمًا.
بس في شوية تصرفات لو عملتيها، ممكن من غير قصد تسببي توتر في بيت بنتك، وده آخر حاجة تتمنيها!
خلي بالك من النقاط دي كويس جدًا:
متكلمهاش كل شوية وكل وقت، وخصوصًا لو لسه في بداية حياتها الزوجية.
المكالمات الطويلة والسرد اللي ملوش آخر، ممكن يتسبب في مشاكل وهي مش ناقصة!
متسمحيش إنها تشتكي لك من جوزها أو من أهله، لأنك لو فتحتيلها الباب ده، ممكن تشجعيها (من غير ما تقصدي) على إنها تسيب بيتها.
زياراتها ليكي تكون موزونة.. لا طويلة زيادة ولا كتير، علشان ما تسيبش بيتها فاضي.
ذكّريها دايمًا إن بيتها الأول دلوقتي هو بيت جوزها، ومينفعش تتدخل في حياة إخوتها أو مشاكلهم.
أسرار بيتك خليها ليكي، مش لازم تعرف كل حاجة، حتى لو هي بنتك.
ولو حصل بينها وبين جوزها خلاف؟
اهدي، وطمنيها، واعملي دور الحكيمة اللي بتهدي الدنيا مش بتولّعها!
متدخليش أبوها أو إخواتها إلا للضرورة القصوى.
* علميها حاجتين مهمين جدًا:
١/ ما تسيبش بيتها لأي سبب مهما كان.
٢/ ما تهجرش جوزها في سريرهم، لأن ده بيهد العلاقة أكتر ما بيصلحها.
إوعي تفتكري إنك بترمي بنتك، لأ أبدًا.. إنتي بتحمي بيتها من الهدم، وبتساعديها إنها تبني عشها الطيب على أسس قوية.
* رسالتي لكل أم:
إنتي المدرسة الأولى لبنتك، وإنتي اللي بتجهزيها لحياة مستقرة وسعيدة.
يمكن تتضايق منك شوية، بس صدقيني يوم ما حياتها تستقر، هتفتكرك وتقول: “ماما كان عندها حق .
