نصيحة امى

كتبت/ عزه السيد

وانا بعمل الملوخية أفتكرت نصيحة أمى الغالية كانت، تقولي: “لما تعملي ملوخية، قطعى فيها طماطماية، “.

كنت في الأول مستغربة… طماطماية في الملوخية؟! بس لما جربت، فهمت. ان الطماطم مش بس بتدي طعم حلو أوي ، لأ، دي كمان بتمنع الملوخية تسوّد أو يتغير لونها… وبتفضل خضراء حاجة كده سحرية!

وبعد كده عرفت ان فيتامين سى اللى فى الطماطم بيمنع تأكسد الحديد علشان كده بيفضل لونها أخضر

مش عارفه كانوا بيعرفوا المعلومات دى ازاى حاجات كانوا بيعرفوها بالفطرة سبحان الله

وكمان سر تاني علمتهولي أمي برضو: قرن فلفل حامي!

تخرطيه مع الملوخية وفصين ثوم ريحة الملوخية بنروح فى حتة تانيه

ونص معلقة سكر كمان بتزودها حلاوة وفى الأخر طشة الثوم والكسبرة الناشفة وأهم حاجة الملوخية تغلى غلوة واحدة وتشيليها من على النااااار وتحطيها على عين تكون باردة ووربى غطاء الحلة علشان الملوخية مش تسقط والشوربة تطلع على الوش.

رحمك الله يا امى