ومين يعوض مكانك .. مهما كان
كلمات / أحمد رأفت
زي اليومين دول
من سنه
كنتي لسه معانا هنا
قوليلي خلاص راح أمشي
قولتك
ومين ها يجوز العيال ديه
لسه بدري
من غير تيته ما ينفعشي
بهدوء ابتسمتي
قوم دوق
شوف اخواتك جابوا ايه
وده عملته علي أدي
كبرت بقي معلشي
فاتوني كلهم ومشيوا
ويوم ورا يوم
لساعة الرحيل بتستعدي
تاخدي الدوا
والدوا ما بيجيبشي
الصبح بدري الحق
ع المستشفي لازم نمشي
سألتي علي فين
هتاخدي الحقنه وها نرجع
قولتي. طيب وابتسمتي
كان عندي امل
نروح ونرجع
بس ده محصلشي
قولتك اكتب واشهد
انك في حياتك ما قصرتي
حمدتي ربنا تمتمتي
قل الدكتور نحجزك زعلتي
علي الإنعاش دخلتي
رحتي وما رجعتي
كنتي عروسه والكفن فستان
العيون دموع والقلب ايمان
ومين يعوض مكانك
مهما كان
ليه يا أغسطس يا سبتمبر
دايما جايين بالحزان
ديه امي
وقبلها بكام سنه
ابويا كان
في عليين باذنه
وكل الأحباب عنده
والأمر له وحده مهما كان
المحاسب أحمد رأفت
وكيل وزارة بالجهاز المركزي للمحاسبات سابقا
