كلام ستات وشوية تكات

كتبت / عزه السيد

كلام مهم ومعلومات ع الماشى لكل زوجه وست بيت شاطره

لما تيجي تسلقي الفرخه ابشري بصله وحطي عليها ملح وفلفل اسود وادعكي بيهم الفرخه من بره وجوه وبعدين حطيها تتسلق هتلاقي طعمها تحفه ومفيهاش ريحة زفارة وحطى فى الشوربة بصلة سليمة وكام ورقة لورى وفلفل أسود حصى.

لما تيجي تقلي بطاطس لو عايزاها مقرمشه انقعيها في ميه وملح وخل قبل ما تعمليها بساعتين علي الاقل هتطلع مقرمشة وجميله.

الرز عشان يبقي مفلفل وميعجنش قلبيه في السمنه او الزيت كتير يتشوح افضلي قلبي فيه لحد ما كل حبة رز تتغلف بالمادة الدهنيه وبعدين ضيفي الميه والملح.

ليعطي الليمون اكبر كميه من العصير ضعيه بماء ساخن خمس دقائق او دقيقه بالميكرويف.

سلق البيض المكسور هتجيبى حلة وتحطى ربعها ميه وتحطى عليها مصفاه وترصى فيها البيض المكسور أو المشروخ وتغطيه بغطاء الحلة وتسبيه عشر دقايق على النار يتسلق على البخار.

حطى فى ارضية حلة محشى الكرنب خضره وطماطم وبصل وعروق الكرنب قطعيهاوال تحبي تحطيه بس ذودي معلقة زيت ورشة كسبره ناشفه ورصي عليهم المحشي ..هيبقي تحفه وريحه وطعم.

يجب غسل الخضار والفاكهة بالماء والخل لإزالة جميع العناصر التي لا ترى بالعين المجردة. بحيث يتم إضافة ملعقة كبيرة من الخل في كمية مناسبة من الماء، بعد ذلك تنقع الخضروات والفواكه لمدة 15 دقيقة، ثم تشطف جيدًا بالماء قبل تناولها أو طهيها. هذه الطريقة تمكن من التخلص من98 في المائة من البكتيريا.

تخليل عروق الكرنب هاتى برطمان وعقميه بشوية خل ورصى فيه عروق الكرنب وكام قرن فلفل حامى اغلى لتر ميه وسبيها تبرد حطى معاها ٣ معالق كبار ملح ومعلقة كبيرة سكر ونص معلقة صغيرة ملح ليمون ومعلقة صغيرة كمون ومعلقتين كبار هريسة شطة أو فلفل أحمر مفروم او بابريكا وفصين ثوم ومعلقتين خل وعصير ٢ ليمونة وقلبى كل المكونات مع الميه وانزلى بيهم على البرطمان لحد ما تغطيه بالميه أقفلى عليه الغطا ورجى البرطمان وسيبيه فى المطبخ وبعد يومين دخليه الثلاجة وتطلعى منه بيبقى حكااايه مع أى اكل بيفتح النفس.