كلام ستات وشوية تكات
كتبت / عزه السيد
كلام جميل اسمعيه واعملى بيه
تكاتي السحرية عشان تفضلي لابسة هدومك وكأنها لسه طالعة من المحل!
اللبس الأبيض:
لو لقيتيه مصفر أو في بقع تحت الإبط، بالله عليكي متقربيش من الكلور
جربي نقطة معجون سنان على البقعة بعد ما تبليها شوية، افركيها برفق واغسلي القطعة كلها… هتتلّمع كأنها جديدة
بقع الصوص أو الزيت:
شامبو الشعر هيشيلها في ثانية
شخبطة القلم:
امشي على العلامة بصابونة حمام، وبعدها استخدمي عملة فضيّة وافركي خفيف… شوفي السحر
ورق البرفان بتاع المولات:
خديه وانتي مبتسمة
وحطيه في درج الشرابات أو الجزامة، الريحة هتفضل فواحة طول الوقت
البنطلون الجينز:
بلاش الغسالة خالص!
انقعيه في ميّه فيها نقطة صابون مواعين وافركي خفيف، كده هتحافظي على لونه وشكله
بقع الدم:
صابونة الحمام كفاية جدًا، هتخليها تختفي كأنها ما كانتش موجودة
الفيزون والفيسكوز:
متعليقيهمش وهم ناشفين!
نقعيهم في ميّه ساقعة فيها تلج، وبعدها سيبيهم يصفّوا لوحدهم، كده هيفضلوا بنفس المقاس والشكل
الأسود اللي بهت:
اغسليه بشامبو شعر، نوع بسيط جدًا، وهتشوفي لونه بيرجع يبرق تاني
بقع الصدأ:
نص لمونة + شوية بيكربونات = البقعة هتختفي في ثواني
الكوتشي اللي باظ:
بلّليه وادعكيه بصابونة وسفنجة ناعمة، هيرجعلك نضيف ومنوّر
