شركتنا…… منضبطة.. بقلم : الدكتور حسين ربيع

جف حلقى وتشقق لسانى كلما جاءنى هاجس تجمع المساهمين حولى يحاسبونى ….. بدأت بعض الهمهمه المتذمره تتعالى ….والعيون الجاحظة تبحلق وتبرق و تترقبنى بلا حياء …. لحظات وساعات وأيام تتوالى …. ومازالت الصحة مشمعة مطاعم الشركة…

ماذا افعل ؟!…. الم يدرك المساهمين  ان هذا ابتلاء من الله ليختبر صبرنا؟!  لم استطع الوفاء بحلول ناجزة لإعادة تشغيلها….. وعايزين يشاركونى التفكير والقرارات لحل المشكلة…..اهو ده اللى ناقص….. مش فاهمين مهمتهم ولا ايه ؟!!…. مطلوب منهم دفع اقساط الاسهم والمشاركة فى ترديد الهتافات وبس ….. نعم دفيعة وهتيفة ليس الا …..مش ناقص الا الفلاسفة صبيان ابو جلمبو يحتلوا الادارة ويسألونا ويحاسبونا !!….. الواحد منهم يشوف حلمة ودنة قبل مايفكر فيها!!..هم فاكرين انهم يقدروا عليها !!.

لكن برضه المشكلة بتتوسع …. وانا مش قادر اقولهم تبرير انى لم أذهب لحل مشكلة الصحة لحد دلوقت!!! اقولهم ايه …. انى منتظر مجلس الإدارة يرجعوا من سفرهم……. فاكرينى غبى …. اعمل مجلس ادارة جديد …. وأعضاء مجلس الادارة المسافرين   يرجعوا يلاقوا نفسهم  من غير شغل…… !!!!

انشقت الأرض والواد فتيحة لقيته بيصفر صفارة طويلة وتلات صفارات قصيرة …. وواقف  على ترابيزة الاستقبال ولا أحسن مايسترو ….. مايسترو مين !!!!! ده عبدالوهاب فى زمانه ماوقفش الوقفه دى…… والمساهمين كلهم خلية نحل :

مجموعة بتحفظ ارقام السجل التجارى والضريبى وتليفونات المساهمين وعناوينهم.

ومجموعة  بتراجع فواتير الشراء والبيع من اول ما اشتغلت مطاعم الشركة.

ومجموعة قاعدة بتراجع دفاتر حسابات الدائنين والمديونيات.

ومجموعة بتتابع المجموعات كلها وتتأكد انها شغالة بجدول زمنى منضبط ….. ايوه كده الكل منهمك ومشغول ….. فعلا …. الايد البطاله …. بتشاغب بسبب ومن غير سبب….. روح يافتيحة…. ربنا يفك عقدة لسانك بحق الايام المفترجة….. ده حتى دكتور الشركة والممرض عندهم انكار للذات … وقاعدين يساعدوا فى حفظ ارقام الفواتير …. أيوه هو انكار الذات وهجر الملذات ….وكمان عندك الكهربائى والسباك والنجار ….. بيراجعوا حسابات وفواتير ….. قلت لكم انكار الذات فعلا مش أى كلام.

مين ده بقه ياسيدى؟ يحيى لماضة…. عايز ايه ياهندسه؟ ….. اصل الجدع يحيى  ده من ساعة ما اشتغل فى السعودية وهو فاهم انه حاجة بتفكر وله مخ يستعمله من غير ما نطلب منه !! هو عامل هيصة وزنبليطة مثل الاسكندرانية امثاله!!!!! …. شوية يقول الرؤية ..كانها لبانة لاتتوقف ….. وشويتين يقول التغيير …… اكيد قاصد يغيرنى انا ومجلس الادارة …. لما يشوف قفاه …. اللى قابليه كلهم طلعوا عريانين….. ملط … يعنى لوحدهم … ولا مساهم معاهم.

ايه؟!! عايز تعرف ملاحظات الصحة فى محضر تشميع المحلات عشان تنفذها ….. وهل حضرتك مكلف بهذا الأمر؟!! هل سيادتك بتدعى اننا لانعمل فى هذا الاولوية الجسيمة!!….. وانت مالك مين مكلف بيها.!!…. دى معلومات انا مؤتمن عليها ومفوض من المساهمين لتحقيقها…. تقصد ايه ان الناس مشغولة بأمور عبثية؟ كلمنى كلام مفهوم ….. وكمان قاعد تشرح للمساهمين وجهة نظرك!!! ….. لا يانور عينى …. انت تقول لى رأيك وبس وانتهت مهمتك ….. ومش حقك تتحدث مع أيتها مساهم فى رأيك….هو كده …. ده آخر كلام عندى ….ايوه احنا شاغلين المساهمين فى أعمال هامة ولكنها أعلى من ادراكك….. ولازم تفهم ان الأسهم بتاعتك لم يصدق عليها حتى الآن ….. يعنى ممكن جدا تفقد صوتك فى اجتماع المساهمين القادم ….. ولامؤاخذة انت رهن  التحقيق معاك  …..وعلى فكرة ….. انت موقوف عن العمل كمان لان ده مش اول انذار لك…..وعلى فكرة انت مادفعتش الايجار بتاع الشهر الجاى ولا اللى بعد الجاى يعنى شهرين … تتطرد على طول!!!  خير البر عاجله…..وما افسدت المجاهدة الا بالتسويف …..صدق اللى قال عليك  يحيى لماضة!!!!! قال بيفكر قال ….. بدل ماتحرق قلبى وتطعن فى اخلاصى …… شوف زمايلك شغالين مثل النحلة لاتتوقف …..

افهم يا لماضة ….

شركتنا والحمدلله…. منضبطة