أراء وقراءات
بالفلوس
شعر / د.أمين رمضان
بالفلوس
ادفع الأبواب وفوت
سيب البشر
اللي أحلامهم تابوت
اللي أحلامهم
يعيشوا جوا موت
يشربوا كاس الألم
يمكن يفوقوا م الندم
على صرخة في كاس الأمم
فازت آمال
والأمم
غاصت في أعماق الرمال
رجعوا يناموا ع الرصيف
مستنيين حتة رغيف
حاشيينه من أحلام جعان
كفته وكباب
والحلو كاس
مليان هباب
غايبين في عالم م الضباب
ينزل مطر طول النهار
يملا البنوك مليار دولار
بنظرة واحدة
م العيون
تتفتح كل أبواب البنوك
والأمم
نايمة على طلعة نهار
لا قادرة ترجع للظلام
ولا قادرة تمشي للنهار
تايهة يا عيني ف خطوها
مش قادرة تمسك شمسها
بتبكي دنيا ف قلبها
دايبه ف حرارة دمعها
كل الدموع اتجمعت ويا القدر
لما نور الشمس بان
واختفى الخوف م العيون
اتولد إنسان
ورجعله صوته وضحكته
عرفت طريقه خطوته
مد الإيدين
يحضن وطن
حضنه الوطن بحنان
لما الوطن حرر إيديه
من سجنه والسجان
———————
14 ديسمبر 2022
