حجازي محمد نعمان..أب قلما يجود الزمان بمثله 

بقلم / أ.د.نادية حجازي نعمان

بتعمل إيه يابابا …بتعمل إيه بعد وفاتك مما يقرب من 20 عاما …حضرتك لسه عايز تديني كمان ؟؟؟  وإنت متوفي يابابا !!  …ليه يابابا …هل حسيت بتقصير الأحياء حولي فقلت  إنك لابد أن تتصرف …. يا بابا ليس عليك دور تجاهي إطلاقًا وحضرتك متوفي …ليه بتعمل كده ؟؟

تعليم علمتني  …تربية ربتني …كل الكرم شفته منك ومعاك على كل الأصعدة في الحياة …قعدت جنبي كتير تعلمني أكتب حرف الألف والهمزة ….يااااه يابابا من أين لك هذا….إزاي وأنا صغيرة كده علمتني إزاي تتكتب  الهمزة …أعلم جيدًا يابابا إني تعبتك جدًا حتى تعلمت كتابة الهمزة ولكني تعلمتها قبل كل أقراني …كيف لك يا بابا أن تعلمني  فى سني الصغيرة فى هذا الوقت إمتى أحط الهمزة فوق وإمتى أحطها تحت.

هوه فيه حد بيعلم لحد الإحساس !!!! أنا فعلًا مندهشة … كيف علمتني الإحساس بالناس وأنا طفلة صغيرة …. لماذا قلت لي فى هذا السن الصغير جدًا : ماتفتحيش باب العربية إلا لما تبصي ورا يمكن يكون حد جاي فتخبطيه .

إيه يابابا !!!  أعجز ويعجز تفكيري عن حصر ماقدمته لي .

طلب مني الكثير كتابة إسمي ثنائي …إسمي واسم العائلة ( نادية نعمان ) ولكني رفضت يابابا لأني عايزة أستمر حتى وفاتي فى كتابة إسمك بجانب إسمي ولذلك سأظل أكتب إسمي ثلاثي (نادية حجازي نعمان ) لنهاية حياتي ….ربما يمنحني هذا شعورًا أنك بجانبي ولست بعيدًا عني .

نام وإرتاح يا أبي فقد أديت كل ماعليك على أكمل وجه .

اللهم جازيه عن الإحسان إحسانا وعن الإساءة عفوًا وغفرانا

الثلاثاء 20 / 10 /2020