قُبْلَه بعد فوات الأوان
على جبين أختي ابتسام
ألم الفراق…
جوا الضلوع مكتوم
غابة ذئاب
في وشوش بشر بِتْحُوم
راسمة الطهارة ف وشها
وضِلِهَا… أكَلِة لحوم
آه يا ألم…
من هَوَا مسموم
بقلوب عَجَنْهَا…
كل ابليس م البشر
طماع وحاقد
بيحب غيره يتكسر
علشان يعيش
في دنيا فانية م الأثر
يا قلبي آه…
فين اللي كان
واعظ زمانه بالحكم
وقف الزمان
في سكته
من الألم
يبكي مع حزن المكان
على قسوته
نزلت دموعه
فوق جبين الموت
تمسح دمعته
اتحجرت جوا العيون
ما هو كل شيء عَنْدَها
أصبح سكون
هيفيد بإيه
بعد ما الضوء ينطفي
فَتْح العيون
قلمي اللي كان
سيال مشاعر للبشر
بكى وانكسر
لملم حروفه في كفن
يحميها من دنيا العفن
مختارة من صفحة
الدكتور/ أمين رمضان
٢٤ يناير ٢٠٢٠