إسمه إيه

بقلم/خالد طلب عجلان

إسمه إيه عدى علي وعلى الحيران ..خد اللي فيه النصيب ومشي.

خد من صبري وشوقى وشعبان وغيرهم كتير .. والكل بالجنيه شقيان..وشغل شهر في الأرض

وسألوا إسمه إيه..هناخد وصل قال لهم أنا مش فاضي ورايح أصلي الفرض .. راعوا ربنا ..واخدين بالكوا الحرامي.. بيوعظ ..والغلبان برج من راسه هيشت

إسمه إيه…باع التموين والعيش والزيت والسكر والملح.

والغلبان جعان وعريان وبيته هلكان وعدمان وبابه شلح.

إسمه إيه… مابيشبعش بنى بيته وبيعلم أولاده في مدارس خاصة..والغلبان ولاده في مدارس حكومة مجانية..مجانيه ده كلام وشعار والحقيقة اغرب من الخيال…و من قصص السيرة الهلالية.

إسمه إيه.. بوظ قواعد الحياه ولا خشى ولا حياه ..

واصل مع الواصلين وفي فرح بنته مولد وزفة من الأعيان ..عجول اتذبحت وجمال .

من فلوس عوضين وسلامة وجمال.

نهب قوت الغلابة وفي منصبه مدارى.. لا وراه مراقب ولا محاسب ولا معاتب .

واشتكيتة وصورتة وسجلت .

وجريت على المسئول وشاف كل حاجة  ومشكورا قال لي..الصور مفبركة والصوت مش صوته..كان أفضل أخذت أقوال ومضيته…

باين إسمه إيه..واصل

وصعب تقف في طريقه زي القطر السريع .. ياويلك لوعديت من أمامه هيشيلك ويقطعك ويطيرك في

مهب الريح..

يا إسمك إيه..خلي عندك دم وأختشي وأستحي وسيب الناس تعيش الناس بتكلم نفسها وعايشة عيشة كرب

الناس بتنام من العشا  وساعات من غير عشا..

وإنت كرشك مليان وسهران بتاكل في اليوم كذا مرة والناس عيشتها مره

سيب الناس تعيش إن عرفوا يعيشوا ..

مش كفاية همومهم وجوعهم ومرضهم وقهرهم.

الغلبان تعبان لا هيقدر يدفع ولا يتبرع ولا يتخاصم ولا يتصالح ..ولا يتكلم ولا يشتكي.