كتبت ياسمين يحي
محتاجه منه إهتمام إهتمي بنفسك الأول خليها دائما في المقام الأول في حياتك
محتاجه تحسي بحبه….. حبي أنتي نفسك ألأول
عايزة يحترمك احترمي انتي حقوقك واحتياجاتك
عارفة إن الراجل بيحب الست المستقله فكريا و اللي عارفه حقوقها و بتحافظ عليها حتي لو بين العكس
..لما تلاقي ان علاقتك مع جوزك بقت مضطربة و مليانة مشاكل.
او انك حاسة انه بيبعد و انك مبقتيش من اولوياته..
و قبل متجري علي الكوافير تقصي شعرك و تضربيه الاحمر العنابي التمام.. زي ما صاحبتك نصحتك..
أو تروحي الجيم و تمشي عل دايت اللي ينزل ١٥ كيلو فى الاسبوع…
“طبعا دول مشوارين مهمين مقدرش أعترض”
بس في حاجة أهم لازم نعرفها كلنا..
على فكرة مش لازم يبقي سبب نفور الزوج ان الزوجة مقصرة في حقه… لا بالعكس
ساعات تضحية الزوجة المفرطة و استمواتها إنها ترضيه بيبقوا السبب..
ساعات الزوج بيطفش لما بيحس ان مراته معندهاش حاجة غيره في حياتها… مفيش اهتمامات عندها غير هياكل ايه و هيلبس ايه و هيقعد معايا اد ايه..
ساعتها بس بيحس انها مملة..فاضية.. مفيهاش جديد.. مواضيعها مكررة..
ساعتها بس بيبدأ يدور علي حاجة جديدة.. مثيرة.. عندها جديد تحكيه..
انا مقلتش انه هيدور علي واحدة تشاركه اهتماماته…لا هو هيدور علي واحدة يشاركها اهتماماتها… و توريله دنيا جديدة..
طيب انتي عارفة ان كل اخصائين الاستشارات الزوجية بيدينوا تضحية الزوجة عشان عارفين ان معظم الرجالة بيعتبروا تضحية الست … غباء و ضعف..
انتي عارفة ان دينك مقالش انك تضحي بحقوقك.. ايا كانت عشان اي حد..لا زوج و لا اولاد..
حبي نفسك وقدريها علشان دا هينعكس عليكي مع زوجك