العقوق الصامت
كتبت / عزه السيد
في عقوق كده بيتسمي بالعقوق الصامت ده معناه ايه؟
انك تبقي شايفه مامتك واقفه عالحوض ضهرها محني عشان تغسل شوية مواعين، واقفه بتطبخ طبخه وهي بتتوجع عشان تاكلي منها، بترتب مكان انتي كنتي قاعده فيه وقومتي من غير ماتنضفي وراكي، تدخل ترتبلك سريرك وهي تعبانه عشان عاوزاكي تبقي مرتاحه في غرفتك وهي كمان نفسيتها ترتاح، بتضغط علي نفسها عشان تعيشوا في مكان نضيف في حين انك ممكن بدل نص ساعه زياده بس عالفون تقومي تساعديها وتنجزي معاها اللي تقدري عليه..
يدوب هي تطبخ وانتي تشطبي المطبخ، هي تغسل وانتي تنشري، هي تطبق الغسيل وانتي تاخدي ترتبيه في الدولاب،هي تعملك حاجه حلوه تخرج تلاقي البيت متروق والبخور شغال…
ده حقها عليكي ومش فضل منك أبداً وكلامي مش موجه للبنات بس ده للبنات والأولاد كمان الحياه مشاركه وأبسط مافيها اننا نقدم إيد المساعده لأمهاتنا وآبائنا علي قدر استطاعتنا…
اللهم ارزقنا بر أولادنا في حياتنا وبعد مماتنا وارحم أمهاتنا اللي فارقونا وعوضنا خير عنهم وبارك في عمر أمهاتنا اللي منورين حياتنا ولسه قادرين نردلهم الجميل.
