أراء وقراءات
القنطرة شرق
من نن عين المستحيل
قادوا الفتيل
وفجروا العبوة
اتفجرت بقوة
تحت القدم العدوة
شفت بعيني الشرارة
مليون طلقة إشارة
جوة قلوب الرجال
في الحال راحوا يمدوا
من دمهم قناية
من جسمهم جسور
من عضمهم شظايا
وقوارب للعبور
ويعدوا يحضنوكي
م الأسر يحرروكي
يا مدينة القنطرة
واصحى يا حلم فينا
اصحى عدينا سينا
والضفة ملكنا
وعلمنا رايح جاي
اصحى يا حلم فينا
غني العبور ع الناي
برضه كدة دموعك!!
بقى لما حققناك
من بعد ما شلناك
بين الحشا والقلب
نلقاك كدة بكاي؟!
*********
بابكي..
ومين ما بكاش
مين شاف بلاده بتعبر
وتطوي ليل الهزيمة
وايدين ولاده بترفع
الراية حرة كريمة
وقلبه ما بقولش عينه
في اللحظة دي ما بكاش
صدقت يا حلم عمري
دي لحظة ما تتنساش
لحظة بيان الإذاعة
قراه وصوته انحاش :
جانا م القيادة
بيان رقم ستاش
تم اليوم:
تحرير مدينة القنطرة.
*********
منشور من دواوين العبور (٤) للشاعر عبد الحميد زقزوق
