الناس الغلابة
بقلم/خالد طلب عجلان
الناس الغلابة.. وأنا واحد منهم ،عايش بينهم ، وحاسس مشاكلهم ولو زعلوا يوم وغضبوا أرجوك إلمتس عذرهم..وأوعى تزعل منهم
ياللي فوق حس شوية بهم وبفقرهم
ياللي فوق تعرفهم ..ولا اوصفلك شكلهم.
وحده ..وحده ..دول كتير وجايز ما أقدرش أعدهم.
خالتي خضرة ورأس مالها 50 جنية بتاجر بيهم في الخضار من الفجر تصحى ومصلوبة في الشمس طول النهار 50 جنيه رأس مالها تفتكر مكسبها كام.
50 جنية وحضرتك ممكن تدفعهم بقشيش في قاعدة ..مظهرة وفشخرة ..وهي شافت بيهم الويل.
ياللي فوق..عمي عراقي .. والله بالفأس من بعد الفجر شغال ، وعمره عدى الستين ويوميتة 70 جنية طب ده كلام ترضاها.. أنت تعيش بيهم.. ده وراه كوم لحم..واللحم بيته ما شافه ولا عرفه وكوم عيال.
ياللي فوق..عم صابر لسه صابر..ومعاشه كام .. 1200 جنية بعد خدمة فى الحكومة 30 عام صاحب وظيفة مقام وقيمة وعلى المعاش خرجوه ..بعد التعب ياترى حياتة بدأت ولا أنتهت.
وكله كوم وجدي كوم ..عبدالحليم علام مسؤل كبير في وزارة الإسكان سواق يجيبه وسواق بيخده …ولأنه نزيه وشريف وصاحب مبادئ..والله ساكن بالإيجار… لا عنده شقة ولابيت ولا حتى غيط..
ودلوقتي قاعد في بيته بيكتب ذكرياته ..ويقول ياريت…
ياللي فوق ..عم عبدالمنعم فراش مدرسة بيكنس ويفتح ويقفل ..وبيضرب الجرس..وحلف عظيم وصدقتة نفسه يدوق اللحمة ..بس الدنيا زحمة.. واللي فوق فوق واللى تحت تحت..
والجرس من سنين بيضربوا ..بس فين اللي سمع واللى شاف واللى رأى.
ياللي فوق ..أوعى تقولي هما فين بالله عليك..تعالى بكره وننزل أي قرية أو شبرا والوايلي والزاوية ..هتشوف مناظر كتير وعينات منهم ع الرصيف وفي الشوارع ..ناس ماشية تكلم نفسها ..من حقهم الحسبة دايما خربانة .. لا نافعة يمين ولا شمال..
وسألني واحد من اللي فوق عايش في جاردن ستي..وشبرا والوايلي دول عندنا في بلدنا يعني.
وساعتها فهمت ..الفرق بين اللي فوق واللي تحت ..دول ناس في وادي والغلابة في وادي.
وهيفضلوا كدة ..طول مافي مطبل ومغنواتي.
