حلو يا بطيخ
كتبت / عزه السيد
هقولكم على شوية حاجات تاخدوا بالكم منها وانتم بتشتروا البطيخ عشان يطلع معاكم احمر ومسكر
اول حاجه انسو موضوع التطبيل على البطيخ ده .. لانه ملوش لازمه
طيب نشتري البطيخه المدوره ولا البيضاويه ؟؟؟ وايه الفرق ؟
البطيخ المدور ده هو البطيخ الانثى اما البطيخ البيضاوي ده الذكر وعامة الذكر حجمه بيبقى اكبر بكتير من الانثى بس البطيخ الانثى بتبقى مسكره وميتها اقل ومرمله وفي العموم طعمها احلى من الذكر البيضاويه .
البطيخه المنبت بتاعها يكون ناشف مش اخضر لسه عشان لو ناشف وغطسان لجوه شويه معناها انها استوت في ارضها انما لو لسه اخضر معناها انها اتقطفت وهي مازالت ما استوتش كويس.
البطيخ المسكر بيبقى عليه علامات على قشرته واهمها ان القشره عامة لونها اخضر غامق وبتلمع وبتلاقوا اجزاء من القشره عليها نقط بنيه خشنه كده كثيره بجوار بعضها وده معناه ان النحل لامس زهرة البطيخه دي كذا مره وده دليل على حلاوتها .
ومن العلامات الكويسه برده وجود بقعه تكون صفراء على البطيخة مش بيضاء .. لان البقعه الصفراء دلاله على انها مسكره وليها نكهة قويه .
ومتحاولوش تشترو بطيخ من حد عارضه في الشمس فتره كبيره لانه بيبقى ضارب من جوه ..
اخيرا بقى اليومين دول احلى بطيخ موجود هو البطيخ ما شاء الله طعمه مسكر وجميل
