أراء وقراءات
رساله الى اولادى
كتبت / عزه السيد
رساله إلى أولادى
بكرة تكبرو وتنسوا كل حاجة عملتها علشانكم ..
هتنسوا تعبى فى حملكم وولادتكم و رضاعتكم
هتنسوا قله نومى و سهرى بالايام و مش حتفتكروا منظرى و أنا ماشية زى الزومبى
هتنسوا أنى كنت بشيلكم و أنا بطبخ و أنا بغسل و أنا فى الحمام و أنتوا شابطين فيا
هتنسوا أنى قعدت سنين مش باكل لقمه سخنه و لا بشرب كوبايه نسكافيه غير متلجة
هتنسوا ان مكانش بيحلالكم البيبي غير وسط ما باكل و لا الترجيع غير بعد ما تغيروا
مش هتفتكروا لما تكبروا ضهرى اللى اتقطم و أنا بلم الدباديب و لا رجلى اللى مشيت بعرج عليها أيام علشان دوست على المكعبات
هتنسوا ريقى اللى نشف و أنا بعلمكم البطه بتقول كاك و العربية بيب
مش هتفتكروا اللى كنت بعمله و انتوا عيانين و النزول بلبس البيت و انا بجرى علشان حاجة وقعت عورتكم و لا هتصدقوا العياط اللى عيطته بس علشان قلقانه من نتيجة تحليل عبيط
مش هتفتكروا الدكتور اللى كنت بقعد مستنيه دورى بالاربع ساعات و انا بحكى لكم حواديت لحد ما ربنا يكرم و نكشف
هتنسوا شيلي شنط الدنيا علشان أخد هدوم و اكل و أدواتكم
وهتنسوا صحياني بدري في عز التلج و تحضيري لفطاركم و سندوتشاتكم و هدومكم بكل رضا
و حرقه دمى و أعصابي علشان بتمنى أنكوا تبقوا أحسن مني
أمانه عليكوا يا قلبى أنت وهي لما تكبروا أبقوا افتكروا أبسط حاجة ليا عملتها عشانكم
وبرونى انا وابوكم
اللهم ارزق اولادنا العمل الصالح والعلم النافع وارزقنا برهم.
