كتبت عزه السيد
أم تستنجد بوزير الصحة ووزير التعليم وكل من يستطيع سماعها تقول: بنتى فى الصف الخامس الإبتدائى ، جالها الجديرى المائى وهى فى المدرسة رجعتلى أمس بعد المدرسة تشتكى من الحكه وتبكى وعندما نظرت على جسمها فوجئت انه مغطى بحبوب مائية وعرفت إنه الجدرى ، المهم أخدتها وروحت كشفت عليها وفعلا كان التشخيص كما توقعت جديرى مائي وتحتاج للعلاج وللعزل مدة ٣ أسابيع ولازم شهادة صحيه مختومه ،وفعلا روحت بيها الوحدة الصحية وأكدو التشخيص وقالو إعملى تقرير طبى علشان الأجازه ولفيت داخل الوحدة الصحية ده يبعتنى لده ودى تقولى روحى هناك وغيرها تقولى لاء مش هنا روحى المكتب التانى إللى جنبى دوخونى لحد ما ربنا كرمنى وشوفت واحده أعرفها تعمل هناك والحمد لله فضلت معايا لحد ما خلصت التقرير الطبى بالأجازه وإتصدمت لما المسئولة بالصحه قالتلى ان المدرسة دى كل يوم بيجيلى منها أكتر من حالة جدرى ، طب ليه محدش بلغ ،ليه محدش إهتم وكده أكيد بنتى أخدت العدوى من المدرسة المهم شكرتها ومشيت ، وجه دور تسليم التقرير للمدرسة وبالفعل روحت المدرسه وسألت : بنتى عندها جدرى ومعايا أجازه أروح أسلمها فين قالولى شئون الطلبة ، روحت مكتب شئون الطلبه وقولتلهم بنتى عندها جدرى ومعايا أجازه ليها ، وبكل هدوء أخدت منى المسئولة عن الغياب التقرير وقالتلى خلاص انا إستلمته وهحطه فى الشهادات المرضية قلتلها : بس كده؟ قالتلى اه ، ولأنى أم خفت على باقى الأطفال قررت أروح للزائرة الصحية بالمدرسة ابلغها علشان تعرف ان فى حالات عدوى بالمدرسة وسألت عليها ووصلتلها وبلغتها قالتلى إسم بنتك إيه وفى سنه كام قلتلها كتبت الأسم فى دفتر بتكتب فيه أسماء أى طالب دخل عندها تعبان وإدتله مسكن ،وقالتلى خلاص كده وقفلت الدفتر وقعدت تشرب الشاى.
وانا إللى كنت فاكرة إن الدنيا هتتقلب وهيقلقو ويبلغو ويشوفو لو فى إصابات تانى علشان المرض مايتنشرش بين الطلبة لكن للأسف محصلش أى حاجه من ده ، عادى بقا اللى يتعدى يتعدى فييييين الإهتمام بالناحية الصحية لأبنائنا فى المدارس ، فييييين وزارة الصحة،فيييين وزارة التربية والتعليم ،انتو عارفين كام طالب فى الفصل؟ وكام واحد ممكن يكون إتعدى .
إرحمونا وعاملونا كبنأدمين بالله عليكم
