شوية أسرار وحركات علشان أكلك يبقي تمام

كتبت ياسمين يحيى

_وانتي بتسوي الاكل سوية علي نار هادية هيفرق جدا معاكي في الطعم يعني بمجرد أنه يغلي هدي النار و غطي الحلة وسيبي الأكل يستوي براحته عالاخر وشوفي طعمه هيبقي ازاي هتاكلي صوابعك وراه……….
_خلي بالك وانتي بتحطي البهارات عشان كل اكله وليها بهاراتها المخصوصه مثلا الكمون مينفعش تحطيه مع اللحمه العصاج دائما حطي البهار المناسب للوصفة والكمية المناسبة بدون مبالغة عشان متفقديش الطعم الأصلي و اللذيذ للطبق …….

_جربي حطي ملعقة صغيرة سكر للملوخية و البسلة و الرز بالبصل هيديها طعم رائع وكمان هيظهر الطعم ……
_وانتي بتعملي الأرز بالشعرية دايما حطي الشعرية نصف مقدار الأرز عشان تديكي طعم لذيذ زي بتاع المطاعم …….
_إدعكي بصل السلطة الخضراء بملح و ليمون وسبيه علي جنب و يترك ولما تيجي تقدميه حطيه مع باقي المكونات لييييية بقي عشان بيكسر حدة طعم البصل و يقضي علي رائحته الغير مستحبة بالفم …..
_عايزة السلطة الخضراء بتاعتك تبقي زي بتاعت المطاعم ، ضيفي شرائح بصل ، كزبرة جافة ، ملح ، ليمون ، خل ، كمون ، كزبرة خضراء و بقدونس و شبت بجانب الطماطم و الخيار و أي خضار تاني انتي عيزة تزوديه……
_اوعي تسيبي صلصة الكشري تتسبك كتييير هما مجرد غلوتين للحصول علي القوام المضبوط وبس عشان طعمها ميغيرش…….
_بصل الكشري البني قبل ما تحميره حطيه في ملعقة دقيق و نفضي الدقيق الزائد و اقليه لغاية متوصلي للون اللي عيزاه وكده مش هيشرب زيت وهيقرمش……..
_وانتي بتسلقي الفراخ والارانب شوحيها الاول في السمن مع شوية من المستكة و الحبهان وورق اللورا و الفلفل الأسمر الحب كويس والبصل والطماطم وبعدين صبي عليها مايه مغليه واعملي احلي شوربة وادعيلي ……..
_وانتي بتشتري البهارات اشتريها حبوب و نقيها وبعدين اطحنيها و بالنسبة للكزبرة و الكمون حمصيهم الاول علي النار قبل ما تطحنيهم وشوفي فرق الطعم بنفسك……

_اعجني المعجنات و المخبوزات باللبن الرايب و شوفي بقي هيخلي العجينة ازاي هشة و طرية و لذيذة وكلي منها وادعيلي بردة……..
_عيزه ستيك اللحم زي المطعم بالظبط تبليه بملح و فلفل بس……..