طريقة سهلة لحماية الاطفال من التحرش وبدون خجل
كتبت :ياسمين يحيي
( جسمي بتاعي انا و بس )
كان ياما كان …كان في زمان بنت جميلة اسمها روان كانت بنت شاطرة ونشيطه و بتسمع كلام مامتها وفي يوم من الايام مامتها قالتلها انتي كبرتي دلوقتي ياروان وبقى عندك 3 سنين وفيه شوية حاجات لازم تعرفيها كويس …ردت روان وقالتلها قولي يا ماما انا سمعاكي.
قالتلها بصي يا روان جسم كل واحد فينا بتاعه هو وبس .مش من حق اي حد انه يحط ايده علي جسم التاني قالتلها يعني يا ماما انا جسمي بتاعي انا و بس؟ . قالتلها طبعا يا حببتي الكلام ده للولد وللبنت برضه وعشان كدة مينفعش اي حد يشوف جسمك غير مامتك بس ولما تدخلي الحمام لازم تقفلي الباب عليكي .
ومحدش يحميكي غير ماما وبابا ،ولما تكبري شوية تحمي نفسك بنفسك. ولو اي حد عايز يسلم عليكي ويبوسك حتي و لو من قريبا يبوسك من خدك بس غير كدة يبقي غلط ، وكمان مينفعش تقعدي علي رجل حد خالص احنا خلاص كبرنا ومنغيرش هدومنا قدام حد تماما .
وفيه اماكن معينة في جسمنا مينفعش حد يجي جمبها ابدا وراحت مامتها جابت عروسة من بتوع روان و شرحتلها الاماكن دي فين بالظبط .
كانت روان قاعدة بتسمع لكلام مامتها ومركزة جدا وبعد ما مامتها خلصت كلامها، قالتلها طيب افرضي يا ماما حد ضايقني وحط ايده علي جسمي اعمل ايه ؟.
قالتلها بصي ياروان لو حد حط ايده علي جسمك او عمل حركة ضايقتك من اللي قولتهالك لازم متسكوتيش؛ و تزقي ايده و تجري بسرعه لبعيد و تيجي تقوليلي او تقولي لبابا علي طول و احنا هنعرف نتصرف ازاي، او تصرخي بصوت عالي و انا او بابا هنجيلك بسرعه ..قالتلها حاضر يا ماما.
و لما تروحي المدرسة تبقي تجري تقولي للمدرسة بتاعتك بسرعه و متخافيش من حد واي حاجه تحصل لازم تحكيها لماما اول باول محدش يقولك دة سر بيني و بينك او متقوليش لمامتك لان مفيش بنت او ولد شاطرين يخبوا اي حاجه عن مامتهم روان سمعت كلام مامتها و وعدت مامتها انها تنفذه؛
و بالفعل في يوم من الايام جالهم ناس قرايبهم عشان يزوروهم . و هما عندهم روان غصب عنها ادلق عليها كوباية العصير وهيا بتشربها دخلت البنت اوضيتها عشان تغير هدومها اللي اتبلت و قفلت الباب عليها.
و فجأه لاقيت حد من قرايبها بيفتح باب اوضيتها من برة عليها قعدت تصرخ بصوت عالي و تنده علي مامتها ،مامتها جت بسرعه و قفلت الباب عليها .
قريبهم اعتذر لها و قالها انو مكنش يعرف انها في الاوضه بتغير و انه مكنش يقصد …..مامتها فرحت جدا منها لانها اتصرفت صح زي ما اتفقت معاها ……و قالتلها برافوا ياروان انتي اتصرفتي صح انتي بنت شاطرة لان جسمك بتاعك انتي وبس ومينفعش اي حد غير ماما يشوفه .
