طريقة عمل الفنكوش في البيت

بقلم شيماء جوهر

كنا بنتكلم على الحاجات اللي بنحبها في الشتا وجه في الكلام سيرة حاجة لذيذة جدا وبنجبها كلنا وتظهر  فوق في الصورة .وبناء على رغبة إحدى صديقاتي أحب اعرفكوا عليه اللي ميعرفوش واللي يعرفه خير وبركة

ده الفنكوش ..هو نوع من المقرمشات غير الروستيكا …بيبقى طويل زي المكرونة القلم وناشف موجودة برضه ف الصور.

عارفين بريك ابو 2 جنيه؟؟ هو بعينه …كاراتية من الآخر زي ما كنا بنقول عليه زمان ….إنما إيه اختراع .

بيتباع ف الماركت بالشكل ده ومنه أشكال كتير زي الكونو والدايرة المخططة والشباك والوردة .

وألوان بس ما أنصحكوش بيها خالص عشان طعمها سيء للغاية.

ربع كيلو ب 5  جنيه وساعات بيزايدوا ع الفاضي ..

رغم أن عمايله مافيش أسهل منه وهي :

زيت غزير او متوسط عشان والدتكم ما تزعلش …وعلى نار متوسطة و لما الزيت يبقى سخن ، انزلوا بكبشة محترمة في الزيت مفيش دقيقتين لو النار والحرارة كويسة هتلاقوه نفش وترعرع كده تصفوه كويس وتطلعوه قبل ما يتحرق وترشوا عليه توابل بتاعة البطاطس بتتباع ف علب من اي ماركت او من عند العطار وفيها أطعمة كتير أفضلهم الجبنة

كبشة تعمل طبق كبير .

أحلى تسلية لما تفلس ونفسك في حاجة سريعة بدل الفشار .

صحة وعافية

٢٠٢١/٩/٢٦