فتاة صعيدية توجه رسالة الى الملك مينا

اسيوط: دعاء العربي

وجهت فتاة تعيش في قلب الصعيد رسالة الى الملك مينا موحد القطرين  فيما يلي نصها :

إزي جلالتك ، يارب تكون بخير.
أنا حفيدتك المذكورة إدناه، قابعة في أقصي الجنوب، الجنوب ، جلالتك فاكره؟
الجنوب بلد الذهب والمعادن والأثار والعلم والتحنيط .
جلالتك اتنطتط ووحدت القطرين، القطر الشمالي (شمال وداي النيل) والقطر الجنوبي (الصعيد).
الحقيقة جلالتك مشكور ، جعلت من القطرين دولة قويه بجيش قوي واقتصاد قوي يعمها الرخاء والأمن والسلام ، رغم ان جلالتك افتريت على ملك الشمال وقطعت رأسه مع إنه استسلم ، بس مش دي المشكلة، المشكلة إن لو جلالتك شوفت الجنوب دلوقت ، هتقطع رأسنا كلنا
تخيل جلالتك إن نسبة الفقر في الصعيد تجاوزت الحد المسموح به عالميا، وكثير من القري تحت خط الفقر، وإن نسبة الأمية فيه 40في الميه وده خلي الصعيد أرض خصبة للأفكار العقيمة ، طب اسمع دي
67في الميه من مناطق الصعيد بتستخدم مياه غير نظيفه ، وده سبب للأمراض والأوبئه اللي مفيش مستشفيات تعالجها.
مش هثقل علي جلالتك بس البطالة ، البطالة حيث ان سكان الصعيد وفقا لتقارير الجهاز المركزي للتعبئة والاحصاء 22 مليون واحد ، في حين إن حصته من الاستثمارات 13 في الميه.
اصلا من ساعة ما جلالتك اتكالت مفيش استثمارات حقيقة في الصعيد ، غير إيام محمد علي باشا، والسد العالي وخزان أسوان ومصنع الألومنيوم.
وبعديها جلالتك كل شويه نسمع عن استثمارات مفترضة ، وإن طائر الاستثمار يحلق فوق سماء الصعيد.
ويجي طائر الأستثمار يعملها علينا ويمشي.