كلام ستات وشوية تكات
كتبت/ عزه السيد
كلام جميل ومفيد
١-ماتحطيش بيض على المكرونه البشاميل على الوش حطى موتزاريلا او صلصه
٢-اللحمه المفرومه جوه المكرونه البشاميل حطى معاها معلقه صلصه ورشه شطه ولو عندك لمون معصفر افرمى معلقتين وضيفيهم بيودو المكرونه فى حته تانيه خالص
٣- لسان العصفور عشان ماتتهريش حمصيها فى الطاسه الاول بدون اى ماده دهنيه
٤- رشه سكر للملوخيه هتخليها غير اى ملوخيه
٥-الرز الأبيض للفته بالذات حطى معاه فص مستكه اذا متاح ورشه حبهان
٦-صينيه الجلاش باللحمه المفرومه بين كل ورقه والتانيه رشى رشه ميه مع السمنه بتخليها مورقه جدا
٧- خلطه الممبار افضل طريقه تعملى خلطه محشى على النار وأما تتسبك حطى الرز وشوحيه وبعدين افرمى بصل وطماطم نيين وانزلى على الرز بعد مايبرد
٧-المحشى لو هيتحشى ويتحط فى الفريزر افضل تشوحى الرز على النار شويه عشان مايتكسرش
٨-السمبوسك مبتتقليش على نار عاليه اوى عشان يقرمش
٩-شوحى اللحمه او الفراخ فى فص مستكه اذا توافر او بمعلقه سمن فقط قبل ماتنزليهم فى الشوربه
١٠-خلى دايما البشاميل خفيف لاى صينيه وكتير
١١-عشان الخضار فى التلاجه مايبوظش حطى فى الكيس معلقه معدن واقفلى كويس
١٢-شربات الكنافه والحلويات بنحط له رشه ملح ليمون عشان مايسكرش
١٣- اى مربى بنحط بردو ملح لمون فى الاخر بدل الليمون
١٤-الفراخ المشويه حطى لها عصير برتقال فى التتبيله وبشر برتقال وحطى شريحه برتقال جواها ولما تستوى تدهن بخليط صلصه وعسل كنافه وتوضع تحت الشوايه
١٥-عيش الفته قطعيه مربعات واقليه فى الزيت صدقينى مش بيشرب زيت خالص وبيفضل مقرمش.
