كلام ستات وشوية تكات
كتبت / عزه السيد
كلام مفيد اسمعوه
الكيكه بيبقا فيها مرار ليه
البيكنج بودر كتير أو ما اتقلبش كويس ف الدقيق
الرز بياخد شكل الحله ومش بيفلفل ليه
سيبيه اخر شويه علي نار هاديه خالص وتكون الحله محكمه الغلق عشان تكتم البخار ويفلفل الرز
المكرونه البشاميل بتعجن مني ليه
ابقي خلي المكرونه تلات ارباع سوا وانتي بتسلقيها
البشاميل خرز مني وعمل تكتلات اعمل ايه
سيبيه يبرد واضربيه ف الخلاط
الرز البايت نشف ومش هيتاكل اعمل ايه
ضيفي عليه نص كوبايه ميه وسخنيه علي نار متوسطه هيبقا كأنك لسه عملاه طازه
عندي كميه خضره وليمون هتبوظ اعمل ايه
احفظي الليمون زي ماهو ف الفريزر والخضره قطعيها وف الفريزر برضو بينفعو وقت زنقه خليكي ناصحه
مش عندي فرن اعمل حواوشي ازاي
تعمليه ف الطاسه عادي خالص بنقطه زيت هيبقي تحفه
الجمبري بيشد زي الكاوتش
متسيبيهوش علي النار اكتر من خمس دقائق وتكون نار عاليه
الفراخ بتكون زفره مع اني بغسلها بخل
بدلي الخل لليمون احسن كتير اوي الخل بيثبت الزفاره مع معلقه طحينه
اللحمه مش بتعمل شوربه حلوه
ابقي قولي للجزار يديلك قطعه دهنه عشان الدهن هوا اللي بيخلي المرقه حلوه ولونها حلو وشوحي اللحمة مع السمنه في الأول
