كلام ستات وشوية تكات
كتبت / عزه السيد
بلاش تحطى كميه هدوم كتير فوق بعضها فى الغساله علشان كدا بتكونى فاكره انك بتوفرى بس أحب اقولك دا بيمنع ان المسحوق يوصل لكل الهدوم ودا اكبر سبب فى انك بتشتكى ان الهدوم بتغسليها وبتطلع بردو مش نضيفه
تانى حاجه بردو بلاش تحطى كميه هدوم كتيره اكتر من الكميه الى تقدر تستوعبها الغساله مش معنى ان لسه فى سرسوب هوا اروح احطلى فيه خمناشر تيشرت دا بيقصر عمر الغساله معاكى وهتبوظ بسرعه
هاتى اى نوع مسحوق رخيص عادى وحطى عليه شويه الحاجات دى ملح ليمون وكربوناتو وكيس او اتنين من مسحوق ازاله البقع وقلبيهم مع المسحوق كويس وجربي وهتشوفى بنفسك الهدوم بتنور ع الحبل
لما يكون فيه بقع شديده بلاش تحطى الهدوم على طول فى الغساله وتقولى هزود المسحوق وهتنضف اغسلى البقعه بصابونه ريحه وسيبيها منقوعه شويه وحطيها مع الهدوم تحفه وبتشيل اصعب البقع وهتوفر عليكى الاسبراى الغالى ومسحوق ازاله البقع
اوعى تشطفى بقع الحبر بالميه حطي عليها ديتول خام او معجون اسنان وادعكى كويس وبعد كدا اغسليه عادى فى الغساله وبجد هتدعيلى
علشان هدومك تفضل ريحتها حلوه ومتكرمش اول ما الغساله تخلص دورتها طلعى الغسيل وانشريه فورا ولو حصل ظرف ليكى ومقدرتيش فبردو طلعى الهدوم وانفضيها كويس وافرديها على اى طرابيزه لحد ما تنشريها
علشان غسالتك ميبقاش فيها اى ريحه كمكمه لازم تسيبي الباب بتاعها مفتوح نص ساعه بعد كل دوره غسيل
ـاهتمى بدوره التنضيف بالخل والكربوناته أو بالخل وملح الليمون مره كل شهر للغساله علشان تحافظى عليها لعمر طويل ان شاء الله
علشان تخلى الهدوم السودا مزهزهه ومش لونها وصبغتها مجيره حطى فى دوره الشطف زهره زرقا واه متستغربيش ومتخافيش مش هتخلى الهدوم زرقه لا بس هتخلى الاسود مزهزهه وبيبرق برق
لو بتغسلى هدوم ملونه مع بعضها وخايفه الالوان تدخل على بعضها حطى كام منديل مبلل مع الغسيل مفيش لون هيكرف على لون تانى فى الهدوم
كل اسبوع افتحى فلتر الغساله ونضفيه كويس بفرشه اسنان قديمه وحته معجون بيساعد الغساله تشتغل بكفاءه اعلى.
