كلام ستات وشوية تكات
كتبت عزه السيد
شُوية تركات روتينية لو عملتيها هَتٰرَيَحِك
لحمه أو فراخ أو شوربه عدس … وانتي بتغسلي مواعين العشاء. حطيها ع النار جنبك تاخد غلوتين بس وغطيها للصبح
الصبح مش هتاخد منك سوا
أو وانتي بتجهزي الفطار. حطيها جنبك تغلي غلوتين ..
فراخ مشويه اعملي التتبيله وانقعيها .. وعلي الثلاجه أو أديها تشويحه
من بالليل وسويها قبل الأكل ..
المحشي
يوم ماتجيبي الكرنبه اسلقيها علي طول وانتي بتعملي أي حاجه في المطبخ جنبك واركنيها تبرد
ولما ايدك تفضي قطعيها وظبطيها كلها مره واحده وشيلها في((( مصفاه ))) تحتها طبق في الثلاجه
تاني يوم بردو جنب شغلك العادي
اعملي الصلصه وهي بتستوي علي النار تكوني غسلتي الخضره وقطعتيها … ولما الصلصه تبرد خالص شيليها هي والخضره كل واحده ف علبه تلاجه
كده بأه محستيش بتجهيزات المحشي يادوب تغسلي الرز وتلفيها علي السريع. ماتناميش علي حله المحشي صحصحي الله يسترك
وكده المحشي علي يومين جنب شغلك وفي التالت لفتيه .الطريقه دى للناس الملخومه هه أما المسيطرين بيعملوه و بيلفوه في ثواني تحيه تاااني للمسيطرين
المكرونه
من بالليل أو وانتي بتعملي أكل اليوم هتعملي الصلصه وتبرد وعلي علبه تلاجه ولو الوقت ضيق أوي أوي عندك ممكن كمان تسلقي المكرونه وتتصفي ومعلقتين زيت وتبرد خااالص وتسيبيها وتاني يوم أو وقت الأكل يادوب تقلبيهم كويس الأول وعلي نار هاديه …طعمها كأنك لسه عملاها
الكفته تتبل وتتصبع وعلي الثلاجه لتاني يوم او لوقت الأكل
الطبيخ ممكن تسبكي الصلصه و تسيبيها أو كمان تدي غلوه واحده بس للخضار معاها
لو بتحبي الرز بشعريه ممكن تحمري كميه تكفي كام يوم وتشيلها
صينيه المكرونه بشاميل بتعملي كل الخطوات وترصيها في الصينيه وتتغطي كويس وتشيليها في التلاجه لتاني يوم يادوب تحمريها طعمها بيفضل طازه
صينيه الرقاق بعملها وادخلها الفرن تبدأ تلون دهبي فااااتح خالص اطلعها وتبرد واحمرها تاني يوم
الحاجات دي بتنفع لو في عزومه أوي ولو وراكي مشوار
بالنسبه للغسيل
أول ماتصحي من النوم شغلي الغساله
الغسيل يخلص هتكوني خلصتي شغل البيت تنشري قبل المغرب.
ممكن قبل ماتنامي تجهزي الغسيل علي جنب وتشوفي اللي هيتنقع انقعيه للصبح علشان تنجزي وتركنيه على جنب
لما تلمي الغسيل لو فاضيه علي طول طبقيه
لو وراكي شغل هاتي سبت الغسيل جنبك في الأوضه اللي بتقعدي فيها …بعد ماتشربي قهوتك. فضيه قدامك واللي تطبقيه ترصيه في السبت علشان ما يتبهدلش.
