كلام ستات وشوية تكات
كتبت / عزه السيد
كلام جميل ومفيد جداً
لمنع السوس و الحشرات في الدقيق و المكرونه او البقوليات ضيفي فيهم ورق غار ناس كتير هتقولي يعني ايه ورق الغار (يعني ورق لورا _يعني ورق موسي)
تقدري تضيفي ورق غار في دولاب المطبخ لمنع الحشرات و الصراصير
حطي شوية أرز فى الملاحه عشان تمنعي تكتل الملح فيها
ضيفي على الرز دائماً ميه مغليه مش بارده علشان ميعجنش منك
قبل ماتقوري البتنجان ادعكي إيدك باليمونه علشان متسودش
لو اللبانة لزقت في الهدوم مرري عليها تلج واتخلصي من البقايا بفرشة الاسنان أو رشي عليها بيرسول وادعكي كويس هتختفي تماما وادعيلي
بقع الحبر على الملابس تشليها عن طريق دعكها بالديتول الغير مخفف
نخلط الديتول مع معطر كونفرت مع المياه وامسحي بيها الأبواب هتبقي زي الفل
الخل وملح الليمون مع صابون المواعين بيديها لمعان جميل ويزيل اصعب الدهون
لتظيف مفاتيح البوتاجاز نقسم ليمونه كبيره إلي نصين ونرش عليها ملح ليمون وندعك المفاتيح باليمونه لازالة الدهون والزيوت.
